સુરતઃ આજ સુધી તમે વિવિધ રંગોની સાડી બજારમાં જોઈ હશે. વિવિધ થીમ આધારિત સાડી જોઈ હશે. છેલ્લે છેલ્લે તો તમે રાજકારણના વિવિધ રંગોની સાડી પણ જોઈ હશે. દેશમાં જ્યાં એક તરફ ચૂંટણીનો માહોલ છવાતો જાય છે તો બીજી તરફ સરહદ પર યુદ્ધના ભણકારા પણ સંભળાતા જાય છે. આ સ્થિતિની અસર માત્ર શેરબજાર પર જ પડે છે તેવું નથી. આજ કાલ દેશના બદલાતા પ્રવાહોની અસર સાડીબજાર પર પણ પડી રહી છે. એટલે જ તો હવે સુરતની બજારમાં ભાજપની સાડી અને કોંગ્રેસની સાડી બાદ હવે દેશભક્તિના રંગે રંગાયેલી સાડી જોવા મળી રહી છે. અલબત્ત આ સાડી પર તમને સર્જિકલ સ્ટ્રાઈકના રંગો જોવા મળશે.
કેવી છે આ દેશભક્તિની સાડી?
આ સાડી બજાર પર દેશના વર્તમાન માહોલને વ્યક્ત કરે રહ્યું છે. દેશમાં એક તરફ લોકસભાની ચૂંટણી ધીમે પગલે આગળ ધપી રહી છે તો બીજી તરફ સરહદ પર ખૂબ ઝડપથી સૈનિકો આગળ વધી રહ્યા છે. ત્યારે જેની અસર સાડી ઉત્પાદન પર પડી રહી છે. એટલે જ તો ક્યાંક રાજકારણના રંગે રંગાયેલી સાડી જોવા મળે છે તો ક્યાંક દેશભક્તિના રંગે રંગાયેલી સાડી જોવા મળી રહી છે.
સુરતના સાડી બજાર પર રાજકારણના છંટાયેલા રંગોને અભિવ્યક્ત કરી રહ્યા છે. આવનારા મહિનાઓમાં દેશમાં લોકસભાની ચૂંટણી યોજાશે, જેના માટે દેશના બન્ને મુખ્ય રાજકીય પક્ષો કોંગ્રેસ અને ભાજપ દ્વારા સાડીનો સહારો લેવામાં આવી રહ્યો છે. કોંગ્રેસે રાહુલગાંધી અને પ્રિયંકાનીને સાડી પર સ્થાન આપ્યું છે તો ભાજપે મોદીજીને સાડીના સહારે લહેરાતા મૂક્યા છે. બન્ને પક્ષોનો હેતુ સાડીને જ સત્તાની સીડી બનાવવાનો લાગે છે. કેમકે બન્ને પક્ષો સારી રીતે જાણે છે કે સાડી એ દેશના અડધા મતદારોને ઢાંકીને બેઠી છે.
સર્જિકલ સ્ટ્રાઈકના રંગો પાથરીને દેશમાં દેશભક્તિની લહેર ફેલાવોનો નવતર પ્રયોગ
તો બીજી તસવીરમાં સત્તાના જંગથી તદ્દન જુદી જ ભાવના વ્યક્ત કરતા રંગોનું દર્શન થઈ રહ્યુ છે. સુરતના કેટલાક સાડી ઉત્પાદકોએ નેતાભક્તિના બદલે દેશભક્તિને પોતાની સાડી પર સ્થાન આપ્યું છે. કેમ કે પુલવામાં હુમલા બાદ દેશવાસીઓનો મિજાજ બદલાઈ રહ્યો છે. ત્યારે દેશદાઝની ભાવના રંગો સાડી પર થીમ બનીને પથરાઈ રહ્યા છે. સાડી ઉત્પાદક મિલમાલિકોએ સાડી પર સર્જિકલ સ્ટ્રાઈકના રંગો પાથરીને દેશમાં દેશભક્તિની લહેર ફેલાવોનો નવતર પ્રયોગ કર્યો છે. અન્નપૂર્ણા મિલના મનીષ અગ્રવાલ વેપાર સાથે સાથે દેશના શહીદો માટે પણ કંઈ કરવા માંગતા હતા અને એટલા માટે જ તેમણે આધુનિક ટેકનોલોજીથી આ ડિજિટલ પ્રિન્ટવાળી સાડી તૈયાર કરાવી છે.
સુરતના વેપારીઓની દેશભક્તિ આ સાડીઓમાં દેખાય છે
ભારતીય મહિલાઓનો પારંપરિક પોષાક સાડી છે, ત્યારે સાડી પણ હવે ચૂંટણી પ્રચારનું માધ્યમ બનવાથી બાકાત રહી શકી નથી. હાલ લગ્નગાળાની સિઝન ચાલી રહી છે, ત્યારે લોકો સાડીઓ તેમજ અન્ય વસ્તુઓની ખરીદી કરી રહ્યા છે, જેમને હવે બજારમાં એક નવી વેરાયટી જોવા મળી રહી છે. વડાપ્રધાન નરેન્દ્ર મોદીની ડિજિટલ પ્રિન્ટની સાડી અને કોંગ્રેસના રાહુલ અને સોનિયાની ઈમેજવાળી સાડી બાદ હવે સુરતના સાડી બજારમાં દેશભાવનાને પ્રબળ કરી સાડીનું ઉત્પાદન કરવામાં આવ્યું છે. સુરતના વેપારીઓની દેશભક્તિ આ સાડીઓમાં દેખાય છે. જેમાં દેશના બહાદુર જવાનોએ કરેલી સર્જિકલ સ્ટ્રાઈક દર્શાવવામાં આવી છે. તેમાં બંદૂક લઈને ચાલતા સૈનિકો, હેલિકોપ્ટરથી કરતાં હુમલા અને પહાડો તેમજ નદીઓને પાર કરીને જતાં સૈનિકોને દર્શાવવામાં આવ્યા છે. આ સાડીના સુરત જ નહીં પણ ભારતભરમાંથી ઓર્ડર તેમને મળી રહ્યા છે. લોકો પોતાના શોરૂમ કે દુકાનોમાં ડિસપ્લે માટે આ સાડીઓ ઓર્ડર કરી રહ્યા છે.
નવતર રીતે શહીદોને શ્રદ્ધાંજલિ
દેશ પર થયેલા મોટા આતંકી હુમલામાં શહીદ થયેલામાં વીર જવાનોને દરેક નાગરિક પોતાની રીતે શ્રદ્ધાંજલિ આપી રહ્યા છે. ત્યારે આ વેપારીઓએ પણ સર્જિકલ સ્ટ્રાઈકની સાડી તૈયાર કરીને નવતર રીતે શહીદોને શ્રદ્ધાંજલિ આપી છે. સાથે સાથે આ સાડી માંથી જે કાંઈ કમાણી થશે તે સૈનિકોને સહાય માટે મોકલી દેવાની ભાવના પણ વ્યક્ત કરી છે.