VIDEO: થાળી-વેલણ વગાડી વોર્ડનં-7ની મહિલાઓએ કર્યો વિરોધ ઉગ્ર આંદોલનની આપી ચીમકી

સુરેન્દ્રનગરમાં પ્રાથમિક સુવિધાને લઇ નગરપાલિકાની કચેરીમાં મહિલાઓએ હોબાળો મચાવ્યો છે. કચેરીમાં મિનરલ પાણીના જગ ફેંકી અને થાળી વગાડી મહિલાઓએ સખત વિરોધ કર્યો હતો.અને પ્રાથમિક સુવિધાનો અભાવ હોવાથી સ્થાનિકોએ તંત્ર સામે ઉગ્ર વિરોધ કર્યો હતો. જોકે હોબાળો વધુ થતાં પોલીસ ઘટનાસ્થળે આવી પહોંચી હતી.

ઉલ્લેખનીય છે કે સુરેન્દ્રનગર જીલ્લામાં છેલ્લા કેટલાય સમયગાળાથી અંડગ ગ્રાઉન્ડ ગટરના કામગીરી હાથ ધરવામાં આવી છે. ત્યારથી શહેરના રોડને ખોદી નાંખવામાં આવ્યા છે. આ સાથે ઉનાળો શરૂ થતાં જ પાણીનો પણ પ્રશ્ન જોવા મળે છે ત્યારે તંત્રના આ ત્રાસથી કંટાળી આજે શહેરની મહિલાઓએ સુરેન્દ્રનગરની નગરપાલિકા કચેરીએ હલ્લાબોલ કર્યું હતું.

આ ઘટનાની મળતી વિગત પ્રમાણે સુરેન્દ્રનગર પાલિકાના વોર્ડ નં-7ની મહિલાઓએ હોબાળો મચાવ્યો હતો. આ વિરોધમાં મહિલાઓએ પાણી રોડ ગટર અને સફાઇ સહિતની સુવિધાઓને લઇને હોબાળો કર્યો હતો. અને ચીમકી ઉચ્ચારી હતી કે પ્રજાના આ પ્રશ્નોનો ઉકેલ તંત્ર દ્વારા તાત્કાલિક અસરથી નહીં આવે તો આગામી સમયગાળામાં ઉગ્ર આંદોલન કરવામાં આવશે. નગરપાલિકા કચેરીએ ધસી આવેલ મહિલાઓએ થાળી-વેલણ વગાડીને પોતાનો વિરોધ દર્શાવ્યો હતો.