કથિત Audio Clip / મને ખબર છે સ્કેમ છે, મારે કોઈને કહેવું નથી અઠવાડિયામાં બધું સારૂ જોવા મળશેઃ ધારાસભ્ય ધનજી પટેલ

• વઢવાણના ધારાસભ્ય ધનજી પટેલનો ઓડિયો ક્લિપ વાયરલ
• શહેરમાં રૂ.600 કરોડના વિકાસ કામોમાં ભ્રષ્ટાચારની કરી રજૂઆત
• ભ્રષ્ટાચાર, ગુનાઓ વધ્યાનું પરોક્ષ રીતે ધારાસભ્યએ કર્યુ સમર્થન

વઢવાણ વિધાનસભાના ધારાસભ્ય ધનજી પટેલ અને જાગૃત નાગરિક વચ્ચે વાતચીતની કથિત ઓડિયો ક્લિપ સોશીયલ મિડીયામાં વાયરલ થઈ છે. જેમાં ધારાસભ્ય ધનજી પટેલ પોતે પણ વિકાસના કામોમાં ભ્રષ્ટાચાર અને ગુનાઓ વધ્યા હોવાનું આડકતરી રીતે સ્વીકારે છે. પોતે જ હવે પ્રજાની રોડ, રસ્તા, પાણી, ગટર, સફાઈ સહિતની ફરીયાદો માટે સ્પે. સુવિધા ઉભી કરશે તેવું પણ જણાવ્યું હતું.

ધારાસભ્ય ધનજીભાઈ પટેલ દ્વારા આગામી પાલિકાની ચૂંટણીમાં લોકોના કામ ન કર્યા હોઈ તેવા હોદેદારો અને આગેવાનો તેમજ કાર્યકરોને મત નહિ આપવા પણ‌ ઓડિયો ક્લિપમાં જણાવે છે. ખુદ ભાજપના જ ધારાસભ્ય દ્વારા વિકાસના કામોમાં ભ્રષ્ટાચારનો આક્ષેપ કરતા અનેક ચર્ચાઓ વહેતી થઈ છે.

'ખબર છે, સ્કેમ છે'

ફોન કરનારી વ્યક્તિએ ધનજીભાઈને સુરેન્દ્રનગરને તેમના સપનાનું સુંદરનગર ન બન્યું હોવાનો વસવસો વ્યક્ત કરવા સાથે પાલિકાના ભ્રષ્ટાચારની વાત કાઢી હતી નાગરિકે ફોનમાં તાજેતરમાં જ બનાવાયેલા ઓવરબ્રિજની કથળેલી સ્થિતિ અંગે વાત કરી હતી. આ મુદ્દે ધારાસભ્યએ કટાક્ષમાં હાસ્ય વેરીને 'ખબર છે, સ્કેમ છે' કહેતાં સંભળાય છે. તેમણે ફોન કરનારી વ્યક્તિને 'મારે કોઈને ખરાબ કહેવું નથી. અઠવાડિયામાં તમને બધું સારું જોવા મળશે. હવે ચૂંટણીનો સમય આવ્યો છે. આપણા માણસો અંદર આવી જાય અને આપણે વહીવટ કરીએ તો ખેલ પડે. વહીવટમાં આપણે નહીં હોઈએ તો જૂની ફિલમ હાયલા રાખે' તેવી હૈયાધારણ આપવા સાથે પાલિકાની ચૂંટણીમાં પગપેસારો કરવાનો આડકતરો ઈશારો કર્યો હતો.