સાવચેત / સુરેન્દ્રનગર જિલ્લામાં ભારે વરસાદ, ધોળીધજા ડેમ ઓવરફલો થતાં નીચાણવાળા ગામોને કરાયાં અલર્ટ

• સુરેન્દ્રનગરનો ધોળીધજા ડેમ ઓવરફલો
• ભારે વરસાદથી ત્રિવેણી ઠાંગા ડેમ ઓવરફ્લો
• ગોદાવરી ગામને જોડતા પુલ પર ફરી વળ્યા પાણી

સુરેન્દ્રનગર જિલ્લામાં ગઇકાલે સવારથી વરસાદી માહોલ જામ્યો હતો. જેને લઇને જિલ્લાના વઢવાણ, લખતર, ધ્રાંગધ્રાં, મુળી, લીંબડી, સાયલા, પાટડી તાલુકામાં ભારે વરસાદ વરસ્યો હતો. જેને લઇને રસ્તાઓ પાણી-પાણી જોવા મળ્યાં હતા. જો કે ભારે વરસાદના પગલે નદી અને ડેમોમાં નવા નીરની આવક જોવા મળી છે. 

સુરેન્દ્રનગરનો ધોળીધજા ડેમ ઓવરફલો

સુરેન્દ્રનગર જિલ્લામાં ગઇકાલે ભારે વરસાદ જોવા મળ્યો હતો. ઉપરવાસમાં પડેલા ભારે વરસાદના પગલે સુરેન્દ્રનગરમાં આવેલો ધોળીધજા ડેમ ઓવરફલો થયો. ડેમ ઓવરફલો થતાં નીચાણવાળા ગામોને એલર્ટ કરવામાં આવ્યાં છે. તંત્ર દ્વારા ભડીયાદ, જોરાવરનગર, રતનપર, મેમકા, સંકળી, નાના કેરાળા, શીયાણી ગામને એલર્ટ કરાયાં છે. 

સુરેન્દ્રનગરના ચોટીલા તાલુકામાં ભારે વરસાદ

જિલ્લામાં પડેલ ભારે વરસાદના પગલે ચોટીલા તાલુકામાં મેઘમહેર જોવા મળી હતી. આમ ભારે વરસાદથી ચોટીલા તાલુકાનો ત્રિવેણી ઠાંગા ડેમ ઓવરફલો થયો હતો. ત્રિવેણી ઠાંગા ડેમ સતત ત્રીજી વખત ઓવરફલો થયો છે. આ સાથે તંત્ર દ્વારા નીચાણવાળા ગામોને અલર્ટ કરાયાં છે. જેમાં રામપરા, શેખલિયા, મેવાસા, લોમા કોટડી ગામોને અલર્ટ કરાયાં છે. 

મૂળી તાલુકામાં ભારે વરસાદ

સુરેન્દ્રનગરના મૂળી તાલુકામાં ભારે વરસાદ પડ્યો છે. ધોધમાર વરસાદના કારણે ગોદાવરી ગામને જોડતા પુલ પર પાણી ફરી વળ્યા છે. ત્યારે પુલ પર પાણીના પ્રવાહમાં કાર ફસાઇ ગઇ હતી. જો કે ગ્રામજનોએ કારમાં સવાર લોકોને બચાવી લીધા છે.