સુરેન્દ્રનગર / ચૂંટણીની અદાવતમાં ભાજપ નેતા પર તીક્ષ્ણ હથિયાર વડે હુમલો, 15થી વધુ શખ્સોના ટોળાએ કર્યું ફાયરિંગ

• સુરેન્દ્રનગરમાં સુદામડા ગામે રાજકીય હોદ્દેદાર પર જીવલેણ હુમલો
• અજાણ્યા શખ્સોએ તીક્ષ્ણ હથિયારના ઘા ઝીંક્યા
• સાયલા તાલુકા ભાજપ કિસાન મોરચાના પ્રમુખ પર હુમલો
• 15 થી વધુ શખ્સોના ટોળાએ ફાયરિંગ પણ કર્યુ

સુરેન્દ્રનગરમાં સુદામડા ગામે રાજકીય હોદ્દેદાર પર જીવલેણ હુમલો થયાની ઘટના સામે આવી છે. અજાણ્યા શખ્સોએ સાયલા તાલુકા ભાજપ કિસાન મોરચાના પ્રમુખ જ્યારે પરિવાર સાથે બોલેરો કાર લઈ જઈ રહ્યા હતા તે સમયે 15 જેટલા અજાણયા શખ્સો આવી ચડયા હતા અને તીક્ષ્ણ હથિયારના ઘા ઝીકયા હોવાનો આરોપ થઈ રહ્યો છે. જો કે હાલ ઘાયલ થયેલા પ્રમુખની હાલત સ્થિર છે

૩થી 4 રાઉન્ડ ફાયરિંગ કર્યું હોવાનો આરોપ
અચાનક બેનળી ઘટનામાં સાયલા તાલુકા ભાજપ કિસાન મોરચાના પ્રમુખ પર ૩થી 4 રાઉન્ડ ફાયરિંગ થયું હોવાનો આક્ષેપ છે.  સાથે જ હુમલા બાદ દાગીના અને રોકડ લૂંટીને શખ્સો ફરાર થઈ ગયા હોવાની પણ માહિતી મળી રહી છે. અગાઉની ચૂંટણીની અદાવતમાં હુમલો થયો હોવાની ચર્ચાઑ થઈ રહી છે. ગંભીર હાલતમાં ઘાયલને સારવાર અર્થે હોસ્પિટલ ખસેડાયો છે. જ્યાં પ્રાથમિક સારવાર બાદ હાલત હાલ સ્થિર છે. હુમલો અને ફાયરિંગની ઘટનાની પોલીસને જાણ થતાં ઘટના સ્થળે પહોંચી વધુ તપાસ હાથ ધરી છે.

શું કહેવું છે  ઘાયલ સાયલા તાલુકા ભાજપ કિસાન મોરચાના પ્રમુખનું?
'મારી પર ફાયરિંગ કરેલા અને મારો પાંચ તોલાનો ચેઈન અને મોબાઈલ પણ લઈ ગયેલા છે. મને મરણતોલ માર મારી એ નાશી છૂટેલા છે. મારી સાથે તે લોકોએ રાજકીય કિન્નાખોરી રાખી મને આજ માર મારેલ છે. મારા પરિવાર પર પણ હુમલો કરેલ છે. મારી બોલેરો કાર સાથે તે લોકોને ડમ્પર ત્રણ વખત ભટકાવી અમને 7 જણાને એક સામટા મારી નાખવાનો પ્રયાસ કરેલ છે. અને મને 15 જણાએ માર મારી મારી ઉપર ફાયરિંગ કરી મને મારી નાખવાની કોશિશ કરી છે. મને તાત્કાલિક ન્યાય મળે તેવી મારી સરકાર સમક્ષ માગણી છે'.