સુરેન્દ્રનગરઃ ટેકનિકલ સોર્સની મદદથી થાન ખાતેથી લૂંટના આરોપીઓ ઝડપાયા છે. શખ્સ પાસેથી રોકડ રકમ અને સોનાના ચેઇનની લૂંટ ચલાવનાર એક મહિલા સહિત બે આરોપીઓની ધરપકડ કરાઇ છે. આરોપી મહિલા મોબાઇલમાં મિસકોલ કરી મીઠી વાતો કરીને એક શખ્સને મળવા બોલાવ્યો હતો.
પોલીસે આરોપીઓ પાસેથી રોકડ રકમ 40 હજાર સહિત ATM કાર્ડ વગેરે જપ્ત કરાયું હતું. પોલીસે રિમાન્ડ અંગેની તજવીજ હાથ ધરી અન્ય ફરાર આરોપીઓને ઝડપી પાડવા ચક્રો ગતિમાન કર્યા છે.
ઉલ્લેખનીય છે કે વીંછીયા તાલુકાના ગોરૈયાના આચાર્ય ઓધવદાસ સાથે એક અજાણી મહિલા મોબાઇલ પર મીઠી મીઠી વાતો કરતી હતી. આચાર્યને લીંબડી હાઇવે પર મળવા બોલાવી અન્ય ત્રણથી ચાર શખ્સોની મદદથી કારમાં અપરહણ કરી અલગ અલગ જગ્યાએ લઇ ગયા હતા.
આચાર્યને નગ્ન કરી મોબાઇલમાં વીડિયો ઉતારવાની ધમકી આપી હતી. રૂ.10 લાખની ખંડણી માંગી સોનાની ચેઇન અને રોકડ રકમ લઇને લૂંટારૂઓ ભાગી છૂટયા હતા.