ફેસબુક પર અજાણ્યા વ્યક્તિને ભાઇ કે બહેન બનાવતા પહેલા ચેતી જજો. આ ફેસબુક મિત્રની નીતિ કંઇક બીજી તો નથીને, તે જાણી લેજો. નહીંતર કેશોદવાળી થશે. હા, કેશોદમાં એક મહિલાએ ફેસબુક પર મિત્રને ભાઇ બનાવ્યો હતો. પરંતુ આ મિત્રએ બહેનના ઘરે કંઇક એવી કરતૂત કરી કે સૌને ચોંકાવી દીધા.
સુરતના એક ફેસબુક યુવકે કેશોદની પરિણીતાને વિશ્વાસમાં લઇને બહેન બનાવી હતી. થોડા સમય બાદ મહેમાન બની ઘરે રહેવા માટે આવ્યો હતો. આ દરમિયાન મોકો મળતાની સાથે સોના ચાંદીના દાગીના સહિત 7 લાખનો મુદ્દા માલ લઇ ફરાર થઇ ગયો હતો.
ફેક આઈડી બનાવી કરી છેતરપિંડી
કેશોદમાં બહેનના ઘરે માનેલા ભાઇએ ચોરી કરી હોય તેવો બનાવ સામે આવ્યો છે. ફેસબુકના માધ્યમથી મહિલાને બહેન બનાવી હતી. તેમજ ફેક આઈડી બનાવી મહિલા સાથે મિત્રતા કરી હતી. કેશોદમાં બહેનના ઘરે રોકાવા આવેલા ભાઈએ ચોરી કરી છે. જેમાં 7 લાખના મુદ્દામાલ સાથે સુરતથી આરોપીની પોલીસે ધરપકડ કરી છે. આરોપીની વધુ તપાસ હાથ ધરાઇ છે.
મહત્વનું છે કે, મહિલાના નામનું ફેસબુક પર ફેક એકાઉન્ટ બનાવીને છેતરપિંડીના અનેક કિસ્સાઓ સામે આવી ચૂક્યા છે. પ્રેમજાળમાં ફસાવવા માટે ફેસબુકનો ઉપયોગ થાય છે. ત્યારે આ કિસ્સો પણ ચોંકવનારો છે.