ટેબલ ટેનિસ / અર્જુન એવોર્ડ વિનર હરમિતે ઈન્ડોનેશિયામાં પ્રથમ મેજર ઓપન ઈન્ટરનેશનલ ટાઈટલ જીત્યું

• સુરતના પ્રથમ અર્જુન એવોર્ડ વિનર હરમિત દેસાઈ
• દેશના ટોચના ટેબલ ટેનિસ પ્લેયર્સની યાદીમાં સ્થાન 
• ઈન્ડોનેશિયાના બતામમાં યોજાયેલ ટેબલ ટેનિસ ટૂર્નામેન્ટ જીતીને પોતાના નામે વધુ એક સિધ્ધી 

હરમિતે પ્રથમ મેજર ઓપન ઇન્ટરનેશનલ ટાઇટલ જીત્યું

સુરતના હરમિત દેસાઈએ ભારતના જ એન્થની અમલરાજને ફાઇનલમાં હરાવીને બતામ ખાતે યોજાયેલી આઇટીટીએફ ચેલેન્જ ઇન્ડોનેશિયા ઓપન ટેબલ ટેનિસ ટુર્નામેન્ટ જીતી લીધી છે. હરમિત માટે આ પ્રથમ ઇન્ટરનેશનલ મેન્સ સિંગલ્સ ટાઇટલ હતું. ત્રીજા ક્રમના ભારતીય ખેલાડીએ છઠ્ઠા ક્રમના અમલરાજને 11-9, 9-11, 11-9, 11-9, 10-12, 11-8થી હરાવીને ટાઇટલ જીત્યું હતું. તેની કારકિર્દીનું આ પ્રથમ મેજર ટાઇટલ હતું. અમલરાજ 1-3થી પાછળ હતો પરંતુ તેણે જોરદાર લડત આપીને મેચ રોમાંચક બનાવી હતી.

મેચમાં પાંચ લાંબી રેલી ચાલી હતી પરંતુ અમલરાજે કેટલાક પોઇન્ટ આપી દેતાં હરમિતને લાભ થયો 

પાંચમી ગેમમાં હરમિતે શાનદાર રમત દાખવી હતી પરંતુ અમલરાજે પણ એટલો જ સુંદર પ્રતિકાર કર્યો હતો. 10-10ના સ્કોરે હરમિતને એડવાન્ટેજ હતો પરંતુ તે હારી ગયો હતો અને અમલરાજે આ તકનો લાભ લઈને અંતર ઘટાડવામાં સફળતા મેળવી હતી. જોકે સુરતના ખેલાડીએ છઠ્ઠી ગેમમાં વળતો પ્રહાર કર્યો હતો. આ મેચમાં પાંચ લાંબી રેલી ચાલી હતી પરંતુ અમલરાજે કેટલાક પોઇન્ટ આપી દેતાં હરમિતને લાભ થયો હતો.
સેમિફાઇનલમાં હરમિતે પાંચમા ક્રમના હોંગકોંગના લામ સિયુ હેંગને 11-5, 16-18, 4-11, 11-9, 11-5, 11-8થી હરાવ્યો હતો. હોંગકોંગના ખેલાડી સામે હરમિતે સારો પ્રારંભ કર્યો હતો પરંતુ તે 1-2થી પાછળ  હતો . જો કે ત્યાર બાદ તેણે મજબૂત રમત દાખવીને હરીફનો સ્કોર સરભર કરવા ઉપરાંત મેચ પણ જીતી લીધી હતી. બીજી તરફ અમલરાજે સેનેગલના સાતમા ક્રમના ઇબ્રાહિમા દિવાને 11-4, 11-7, 11-8, 11-3થી હરાવ્યો હતો.

હરમિત વિષે જાણવા જેવું

નાનપણથી જ ટેબલ ટેનિસ હરમિતની પ્રિય રમત છે. પરીણામે હરમિતના માતા-પિતાએ ફરજીયાત દરરોજ સાંજે તેની સાથે ટેબલ ટેનિસ રમવું પડતું હતું. સાડા પાંચ વર્ષની ઉંમરથી ટેબલ ટેનિસ રમાવાની શરુઆત કરનાર હરમિત, બે-અઢી વર્ષમાં જ સ્ટેટ અને ત્યાર બાદ નેશનલ લેવલે રમવા માંડ્યો હતો. 14 વર્ષની ઉંમર સુધી હરમિતના પિતા રાજૂલ દેસાઈ જ તેના કોચ હતા અને મોટો ભાઈ હ્રદય દેસાઈ પ્રેક્ટિસ પાર્ટનર હતાં. હરમિતે સ્વિટનથી ટેબલ ટેનિસની પ્રોફેશનલ ટ્રેનિંગ મેળવી છે, અને ત્યાર બાદ સતત મહેનત અને રમત પ્રત્યેના ઝનુનને કારણે સતત સફળતાઓ પોતાના નામે નોંધાવી રહ્યોં છે.

સ્ટોરી અને આલેખન - હરીશ ગુર્જર, સુરત