આન-બાન-શાન / VIDEO: દુનિયાનું સૌથી મોટું બિઝનેસ બિલ્ડિંગ 'ડાયમંડ બુર્સ' સુરતમાં તૈયાર, વિશેષતા જાણીને ગુજરાતીઓને થશે ગર્વ

• સુરતીઓને મળશે સૌથી મોટું ડાયમંડ બુર્સ 
• ડાયમંડ બુર્સથી વિશ્વના વેપારીઓ સુરત આવશે
• ૬૬ લાખ ચોરસ ફૂટમાં ડાયમંડ બુર્સનું બાંધકામ

સુરત એટલે કે, સોનાની મુરત... આ કહેવતથી જ સુરતને અત્યાર સુધી ઓળખવામાં આવી રહ્યું છે. પરંતુ હવે સુરત સોનાની નહીં પણ હીરાની મુરત તરીકે ભવિષ્યમાં ઓળખાશે. કારણ કે, ડાયમંડ સિટી સુરતમાં સમગ્ર વિશ્વનું હીરાના વ્યવસાય સાથે સંકળાયેલું સૌથી મોટું બિલ્ડીંગ એટલે કે ડાયમંડ બુર્સ તૈયાર થઈ રહ્યું છે. ખુદ પ્રધાનમંત્રી મોદી તેનું લોકાર્પણ કરશે. 

ત્યારે કેવું હશે આ ડાયમંડ બુર્સ ?

વિશ્વમાં સૌથી મોટી ઓફિસ બિલ્ડીંગ અમેરિકાના પેન્ટાગોનમાં છે, જે ૬૫ લાખ ચોરસ ફૂટનું બાંધકામ ધરાવે, પરંતુ હવે આ સૌથી મોટા બિલ્ડીંગનું સ્થાન આપણા સુરતમાં બનનાર ડાયમંડ બુર્સ બિલ્ડીંગ લઈ લેશે. કારણ કે, સુરતમાં તૈયાર થયેલું ડાયમંડ બુર્સ બિલ્ડીંગ ૬૬ લાખ ચોરસ ફૂટનું બાંધકામ ધરાવે છે. એટલું જ નહીં નવ ટાવરમાં પથરાયેલું આ બિલ્ડિંગ ગ્રીન બિલ્ડિંગ છે અને નવીનીકરણ તેમજ ગ્રીન એનર્જીમાં સર્વોચ્ચ એવું પ્લેટિનિયમ ગ્રેડેશન પણ ધરાવે છે. સાથે જ વિશ્વની શ્રેષ્ઠ કહી શકાય તેવી તમામ સવલતો અહીં ઉપલબ્ધ કરાવવામાં આવી છે.

ડાયમંડ બુર્સની વિશેષતા

• 10 હજારથી વધુ ટુ વ્હીલર અને 4500થી વધુ ફોર વ્હીલર પાર્કિંગની વ્યવસ્થા
• 15 એકરને ગ્રીન એરિયા તરીકે ડેવલોપ કરવામાં આવશે
• તમામ લેન્ડસ્કેપ પંચ તત્વ થીમ પર કરાશે ડિઝાઈન 
• ટાવર વચ્ચેની 3 વીઘા જગ્યામાં લેન્ડસ્કેપીંગ ડિઝાઈન 
• 4200થી વધુ ઓફિસને મળશે વ્યૂ
• 9 ટાવરની હાઈટ વધવાની સાથે તમામ એકબીજા સાથે જોડાયેલા હશે 
• અમેરિકાના પેન્ટાગોન કરતાં પણ વધુ 66 લાખ ચોરસ ફૂટમાં નિર્માણ 
• બિલ્ડિંગમાં કુલ 128 ડેસ્ટિનેશન કંટ્રોલ લિફ્ટ મૂકવામાં આવશે

વિશ્વના 175થી વધુ દેશોના હીરા ઉદ્યોગ સાથે સંકળાયેલા લોકો અહીં લેશે મુલાકાત

સુરતના ખજોદ વિસ્તારમાં તૈયાર થઈ રહેલા આ સુરત ડાયમંડ બુર્સમાં વિશ્વના ટોચના 4300થી વધુ હીરાના વેપારીઓ કે કંપનીઓ અહીંયા પોતાનો કારોબાર શરૂ કરશે. આ સાથે જ સમગ્ર વિશ્વના ૧૭૫થી વધુ દેશના હીરાના વ્યવસાય સાથે સંકળાયેલા લોકો અહીં અવાર નવાર મુલાકાત લેશે. ખાસ વાત તો એ છે કે, ડાયમંડ બુર્સમાં વિશ્વની શ્રેષ્ઠ તત્વ ઈઝ જ્વેલરી કંપની પોતાના શોરૂમના કામકાજ પણ કરનાર છે. અહીં ડાયમંડ બુર્સમાં વિશ્વના શ્રેષ્ઠ વેપારીઓની જરૂરિયાતોને ધ્યાનમાં રાખીને ફાઈવ સ્ટાર હોટલ, બેંક અને કસ્ટમની પણ સવલત ઉભી કરવામાં આવી છે.

4 હજારથી વધુ વેપારીઓ સાથે મળી બનાવ્યું ડાયમંડ બુર્સ

મહત્વની બાબત તો એ છે કે, સુરત ડાયમંડ બુર્સ કોઈ એક કંપનીએ કે વ્યક્તિએ તૈયાર નથી કર્યું પરંતુ સુરત અને મુંબઇના હીરા વ્યવસાય સાથે સંકળાયેલા 4 હજારથી વધુ વેપારીઓએ સાથે મળીને આ ડાયમંડ બુર્સનું સ્વપ્ન સાકાર કર્યું છે. 4 હજારથી વધુ વેપારીઓએ સાથે મળી એક કંપની બનાવી અને પોતાની જરૂરિયાત મુજબ જગ્યા અહીં ખરીદી છે. વિશ્વમાં યુનિક કહી શકાય તેવા આ પ્રોજેક્ટની કલ્પના પણ અન્ય વ્યવસાયીઓ કરી શકતા નથી, ત્યારે સુરતના હીરાના વેપારીઓએ એ કલ્પનાને વાસ્તવમાં પૂર્ણ કરી બતાવી છે.

સુરતમાં ડાયમંડ બુર્સ બનશે સુરતની આન-બાન-શાન

સુરતમાં ડાયમંડ બુર્સ કાર્યરત થશે એટલે સુરતની જે આન-બાન-શાન છે તેને ચાર ચાંદ લાગી જવાના છે. હાલ હીરાઉદ્યોગ સાથે સંકળાયેલા તમામ લોકો સુરતના ડાયમંડ બુર્સને લઈને ખૂબ ઉત્સાહિત છે. તાજેતરમાં જ દુબઈ ખાતે ચાલી રહેલા એક્સ્પોમાં જ્યારે હીરાના વ્યવસાયીઓ સમક્ષ સુરતમાં તૈયાર થઈ રહેલા ડાયમંડ બુર્સનું પ્રેઝન્ટેશન કરવામાં આવ્યું કે, ત્યાંની ૧૦થી વધુ મોટી કંપનીના સંચાલકોએ સુરતના આ ડાયમંડ બુર્સમાં પોતાની ઓફિસ ખરીદવા માટે તૈયારી દર્શાવી હતી. આજ દર્શાવે છે કે, આગામી સમયમાં સુરત વૈશ્વિક ઓળખ બનવા જઈ રહ્યું છે.

ડાયમંડ બુર્સના પ્રચાર અને પ્રસાર માટે ડોક્યુમેન્ટરી બનાવાશે 
સુરત ડાયમંડ બુર્સનો દેશ-વિદેશમાં પ્રચાર-પ્રસાર કરવા માટે ડોક્યુમેન્ટરી બનાવાનો નિર્ણય લેવામાં આવ્યો છે. આ ડોક્યુમેન્ટરી 80 દેશની સ્થાનિક ભાષામાં બનાવાશે તથા આ ડોક્યુમેન્ટરીના 22-22 મિનિટના અલગ-અલગ એપિસોડ બનાવાશે અને 80 દેશમાં 6 મહિના સુધી આ ડોક્યુમેન્ટરી પ્રસારિત કરવામાં આવશે.