સુરતમાં રાજ્યના આરોગ્ય મંત્રી કુમાર કાનાણીના પુત્ર પ્રકાશ કાનાણી અને મહિલા પોલીસકર્મી વચ્ચેની બબાલની ઘટના હાલ ગુજરાતમાં ચર્ચાનો વિષય બની છે. જેમાં પ્રકાશ કાનાણી અને તેના મિત્રોએ કરેલી બબાલનો ઓડિયો વાયરલ થયો હતો. જો કે, ત્યારબાદ હવે ઘટાનાનો નવો એક વીડિયો સામે આવ્યો છે. જેમાં આરોગ્ય મંત્રી મહિલા પોલીસકર્મીને કહી રહ્યાં છે કે મારો દિકરો MLAની પ્લેટ સાથે જ ફરશે. આ વાયરલ વીડિયો બાદ આરોગ્યમંત્રીએ નિવેદન આપ્યું છે કે મારા પુત્રએ જો કાયદાનો ભંગ કર્યો હોય તો કાર્યવાહી કરો.
મહિલા કોન્સ્ટેબલ અને કુમાર કાનાણી વચ્ચેની વાતચીતનો વીડિયો
ઉલ્લેખનીય છે કે, સુરતમાં મહિલા કોન્સ્ટેબલ અને પ્રકાશ કાનાણી વચ્ચે કર્ફ્યૂના સમયે વિવાદ થયો હતો. આ દરમિયાન પ્રકાશ કાનાણીએ પોતાના પિતા કુમાર કાનાણીને ફોન કર્યો હતો. ત્યારે હવે આ ઘટનાનો વધુ એક વીડિયો સામે આવ્યો છે. મહિલા કોન્સ્ટેબલ અને કુમાર કાનાણી વચ્ચે થયેલી વાતચીતનો વીડિયો સામે આવ્યો છે.
મારો દીકરો MLAના પ્લેટની ગાડી લઈને ફરી શકે છે : આરોગ્ય મંત્રી કુમાર કાનાણી
આ વીડિયોમાં મહિલા કોન્સ્ટેબલે કુમાર કાનાણીને સવાલ કર્યો કે, તમારો દીકરો ગાડી લઈને નિકળી શકે છે, શું MLAની પ્લેટ લગાવીને ફરી શકે છે, આ મામલે કુમાર કાનાણીએ જવાબ આપ્યો છે કે, મારો દીકરો MLAના પ્લેટની ગાડી લઈને ફરી શકે છે, તમારે જ કાર્યવાહી કરવી હોય તે કરી શકો છો.
સુરતમાં પ્રકાશ કાનાણી અને મહિલા કોન્સ્ટેબલ વચ્ચે વિવાદ થયો હતો. આ ઘટનાને લઈને સોશિયલ મીડિયામાં લોકોએ મહિલા કોન્સ્ટેબલના સમર્થનમાં આવ્યા છે.`હું પણ સુમિતા યાદવના સમર્થનમાં' ની લોકો સોશિયલ મીડિયામાં પોસ્ટ કરી રહ્યા છે. ટ્વીટર પર હાલમાં આ મુદ્દો ટ્રેન્ડ થઈ રહ્યો છે.. લાખોની સંખ્યામાં લોકોએ ફેસબુક, ટ્વીટર પર પોસ્ટ કરીને મહિલા કોન્સ્ટેબલને સમર્થન કર્યુ છે.