ગુજરાત / સુરતમાં મહિલા કોન્સ્ટેબલ-પ્રકાશ કાનાણી વિવાદ મામલો, કુમાર કાનાણીએ કહ્યું કે કાયદાનો ભંગ કર્યો હોય કાર્યવાહી કરો

પ્રકાશ કાનાણીના વિવાદ મામલે આરોગ્ય મંત્રી કુમાર કાનાણીનું નિવેદન આવ્યું છે. જેમાં આરોગ્ય મંત્રીએ કહ્યું છે કે કાયદાનો ભંગ કર્યો હોય તો કાર્યવાહી કરો. આ સાથે કુમાર કાનાણીએ મહિલા પોલીસકર્મીના વર્તન પર પણ સવાલ ઉઠાવ્યાં છે. આરોગ્ય મંત્રીએ કહ્યું કે મહિલા પોલીસ કર્મીએ અપશબ્દો કહ્યાં, સમગ્ર મામલે પોલીસતપાસ કરી રહી છે. 


સુરતમાં મહિલા કોન્સ્ટેબલ અને પ્રકાશ કાનાણી વચ્ચે કર્ફ્યૂના સમયે વિવાદ થયો હતો. આ દરમિયાન પ્રકાશ કાનાણીએ પોતાના પિતા કુમાર કાનાણીને ફોન કર્યો હતો. ત્યારે હવે આ ઘટનાનો વધુ એક વીડિયો સામે આવ્યો છે. મહિલા કોન્સ્ટેબલ અને કુમાર કાનાણી વચ્ચે થયેલી વાતચીતનો વીડિયો સામે આવ્યો છે. આ વીડિયોમાં મહિલા કોન્સ્ટેબલે કુમાર કાનાણીને સવાલ કર્યો કે, તમારો દીકરો ગાડી લઈને નિકળી શકે છે, શું MLAની પ્લેટ લગાવીને ફરી શકે છે, આ મામલે કુમાર કાનાણીએ જવાબ આપ્યો છે કે, મારો દીકરો MLAના પ્લેટની ગાડી લઈને ફરી શકે છે, તમારે જે કાર્યવાહી કરવી હોય તે કરી શકો છો.

• MLAના દીકરા અને તેના મિત્રો માટે કોઈ કાયદો નથી?
• પ્રકાશ કાનાણી કેમ MLAની પ્લેટ લગાવીને ફરે છે?
• MLAની પ્લેટ લગાવીને ફરતા પ્રકાશ સામે કાર્યવાહી કેમ નહી?
• શું મંત્રીના દીકરાને કોઈ પકડી શકતું નથી?
• અત્યાર સુધી આ મામલે ફરિયાદ કેમ નોંધાઈ નથી?
• ઉચ્ચ અધિકારીઓએ ફરિયાદ કેમ ન નોંધી?
• મહિલા કોન્સ્ટેબલ સાથે અભદ્ર વાત કરવી તે યોગ્ય છે?

પ્રાપ્ત વિગત અનુસાર રાજ્યના આરોગ્ય મંત્રી કુમાર કાનાણીના પુત્ર અને પોલીસ મહિલાકર્મી વચ્ચેની બબાલનો એક ઓડિયો વાયર થયો હતો.  જો કે ત્યારબાદ મામલો ગરમાતા ઉચ્ચ પોલીસ અધિકારીઓ સુધી આ વાત પહોંચી હતી. જેમાં ઉચ્ચ અધિકારીઓએ મહિલા પોલીસકર્મીને ઘરે જવાના આદેશ આપ્યાં હતા. ઉચ્ચ પોલીસ અધિકારીઓએ મહિલાકર્મીને તાબડતોડ ઘરે મોકલ્યા હતા. જેમાં ઘટના બાદ મહિલા પીએસઆઇએ રાજીનામું આપ્યું હોવાની ચર્ચા પણ જોર પકડ્યું છે. 

ઉલ્લેખનીય છે કે સુરત ખાતે વરાછામાં કુમાર કાનાણીના દીકરાના મિત્રો રાત્રે ફરવા નિકળ્યા હતા. જેમને રોકવામાં આવતા બબાલ થઇ હતી. મહિલા PSIએ તેના મિત્રોને અટકાવતા પ્રકાશ કાનાણી પણ ઘટના સ્થળે પહોંચ્યા હતા. MLA લખેલી કાર લઈને પ્રકાશ કાનાણી ઘટના સ્થળે પહોંચ્યા હતા.

જોકે પ્રકાશ કાનાણીએ શાંતિ જાળવવા અપીલ કરી હતી. પરંતુ બાદમાં પ્રકાશ કાનાણીની પણ PSI મહિલાકર્મી સાથે બબાલ થઈ હતી. બન્ને વચ્ચે બબાલની ઓડિયો ક્લીપ વાયરલ થતા મામલો સામે આવ્યો હતો. આ મામલો ગરમાતા ઉચ્ચ પોલીસ અધિકારીઓ સુધી વાત પહોંચી હતી.