કોરોનાનો નવો સ્ટ્રેન હાલ જોવા મળી રહ્યો છે ત્યારે કોરાનાકાળમાં રાજ્ય સરકારની મળેલી કેબિનેટ બેઠકમાં આ વર્ષે પતંગોત્સવ રદ્દ કરવાની ગઇકાલે જાહેરાત કરવામાં આવી હતી. ત્યારે રાજ્યના સુરત જિલ્લાને લઇને ઉતરાયણ માટે અધિલ જિલ્લા મેજીસ્ટ્રેટ દ્વારા જાહેરનામું બહાર પાડવામાં આવ્યું છે.
સુરત જિલ્લામાં ઉત્તરાયણને લઈ જાહેરનામું
સુરતમાં ચાઈનીઝ બલૂન અને દોરી પર પ્રતિબંધ
અધિક જિલ્લા મેજિસ્ટ્રેટ દ્વારા જાહેરનામું બહાર પડાયું
સુરત જિલ્લામાં ઉતરાયણને લઇને જાહેરનામું બહાર પાડવામાં આવ્યું છે. અધિક જિલ્લા મેજિસ્ટ્રેટ દ્વારા બહાર પાડવામાં આવેલા જાહેરનામું મુજબ ચાઇનીઝ બલૂન અને દોરી પર પ્રતિબંધ મુકવામાં આવ્યો છે.
જાહેરનામામાં મુજબ ચાઇનીઝ બલૂન કે દોરીનું કોઇએ વેચાણ કે ખરીદી કરવી નહીં. કોઇને જાનને જોખમ થાય તેવી રીતે પતંગ ઉડાડવા નહીં. આ જાહેરનામું 16 જાન્યુઆરી સુધી અમલમાં રહેશે.
હાલ કોરોના વૈશ્વિક બિમારીને લઇને લોકો ઘરની બહાર નીકળતા પણ હાલ ખચકાઇ રહ્યાં છે. ત્યારે રાજ્યમાં કોરોનાને લઇને સાવચેતીના પગલા રુપે તહેવારો ઉપર પ્રતિબંધ મુકવામાં આવી રહ્યાં છે.
રાજકોટ પોલીસ કમિશનરે બહાર પાડ્યું હતું જાહેરનામું
આ અગાઉ રાજકોટ પોલીસ કમિશ્રર દ્વારા પણ ઉત્તરાયણને લઇને જાહેરનામું બહાર પાડવામાં આવ્યું હતું. જેમાં ચાઇનીઝ દોરી અને બલૂન પર પ્રતિબંધ મૂકવામાં આવ્યો હતો. આ સાથે જાહેરમાં ઘાસચારાના વેચાણ પર પણ પ્રતિબંધ મૂકવામાં આવ્યો હતો. આ સાથે ઉત્તરાયણના દિવસે લોકોને ધાબા પર લાઉડસ્પીકર પણ વગાડવાની પણ મંજૂરી આપવામાં આવી નથી. લોકોએ ધાબા પર કોવિડ-19 ગાઇડ લાઇનના નિયમનું પાલન કરવું પડશે.
રાજ્યમાં તમામ પતંગોત્સવ રદ્દ કરાયા
ગુજરાતમાં હાલ કોરોના વાયરસની મહામારીનો કારણે રાજ્યમાં આગામી મહીને યોજાનારા તમામ પતંગોત્સવ રદ્દ કરવામાં આવ્યાં હતા. ગાંધીનગર ખાતે મળેલી કેબિનેટ બેઠકમાં આ અંગેનો નિર્ણય લેવામાં આવ્યો હતો. કેબિનેટ બેઠકમાં વિવિધ શહેર અને જિલ્લામાં યોજાનારા પતંગોત્સવ તેમજ આંતરરાષ્ટ્રીય પતંગોત્સવને રદ્દ કરાયાં છે.
ઉત્તરાયણના તહેવારને લઈને અમદાવાદ પોલીસ કમિશ્નરે બહાર પાડ્યું હતું જાહેરનામું
અમદાવાદીઓ અને ગુજરાતીઓને મનપસંદ તહેવાર ઉત્તરાયણ નજીક આવી રહી છે. ત્યારે ઉત્તરાયણના તહેવારને લઈ અમદાવાદ શહેર પોલીસ કમિશનરે જાહેરનામુ પ્રસિદ્ધ કર્યું હતું.
ઉત્તરાયણને લઇને અમદાવાદ પોલીસ કમિશનર સંજય શ્રીવાસ્તવે એક જાહેરનામું બહાર પાડ્યું છે. જેમાં ચાઈનીઝ લોન્ચર, ચાઈનીઝ તુક્કલના ઉત્પાદન, વેચાણ પર પ્રતિબંધ મુકવામાં આવ્યો છે. તો ચાઈનીઝ દોરાના વેચાણ અને તેના ઉપયોગ પર પણ પ્રતિબંધ મુકાયો છે.
વધુમાં અમદાવાદમાં રસ્તા પર, ફૂટપાથ પર પતંગ ઉડાડવા પર પ્રતિબંધ કરાયો છે. તો લાઉડ સ્પિકર, ઉશ્કેરણીજનક રીતે પતંગ ઉડાડવા પર પણ પ્રતિબંધ રહેશે. વાયર પર લંગર, બંબુ, લોખંડના ઝંડા નાખવા પર કાર્યવાહી થશે.