સુરતના ડિંડોલીમાં ઉમેશની ગેંગના શખ્સોએ કુખ્યાત બંટી દયાવાનના ઘર પર પથ્થરમારો કર્યો હતો. ત્યારબાદ હુમલા કેસમાં બંટી દયાવાનના બે સાગરીતને પોલીસે પકડી લીધા છે.
સુરતમાં ઉમેશ ગેંગ Vs બંટી દયાવાન ગેંગ વચ્ચે ધબધબાટી
બંટી દયાવાનના ઘર પર પથ્થર મારો
બંટી દયાવાનના બે સાગરીતની ધરપકડ
સુરતમાં કાયદો અને વ્યવસ્થા અભેરાઈએ ચડયા હોય તેમ લૂંટ અને મારામારીની ઘટના સામાન્ય થઈ ગઈ છે. દિવસેને દિવસે અનેક વિસ્તારોમાં મારામારી અને ધર્ષણ સહિતની ઘટના પ્રકાશમાં આવી રહી છે ત્યારે આવી જ ઘટના ત્રણ દિવસ પહેલા સામે આવી હતી. સુરતના ડિંડોલીમાં ગુરુવારે મોડીરાત્રે ઉમેશની ગેંગે માથાભારે બંટી દયાવાનના ઘર પર પથ્થરમારો કર્યો હતો. ત્યારબાદ બંટીના સાગરીતોએ આતંક મચાવ્યો હતો અને બંટી દયાવાનના ભાઈ સહિત સાત સાગરીતોએ ચિંતાચોકમાં યુવાન પર જીવલેણ હુમલો કરી હવામાં ફાયરીંગ કર્યું હતું. ત્યારબાદ ત્યાંથી નીકળી ગાયત્રીનગરમાં વધુ એક યુવાન પર હુમલો કર્યો હતો.આ મામલે ડિંડોલી પોલીસે બનાવ અંગે બે ગુના નોંધી બંટી દયાવાનના બે સાગરીતની ધરપકડ કરી હતી.
ઉમેશ ગેંગના લાલુ, ચંદન અને અતુલે કર્યો હતો પથ્થરમારો
ગુજસીટોકના ગુનામાં હાલ જેલમાં બંધ કુખ્યાત બંટી દયાવાનના ઘર પર ગુરૂવારની રાત્રે પથ્થર મારો કરવામાં આવ્યો હતો. રાત્રે 11 વાગ્યે બંટીના ઘરે મહેમાન જમતા હતા ત્યારે એક બાઈક પર ઉમેશ ગેંગના લાલુ, ચંદન અને અતુલ આવ્યા હતા. ત્રણેયે સંગીતાબેન અને તેમના પરિવારને ગાળો આપતા સંગીતાબેને દરવાજાની જાળી ખોલી જોયું તો અતુલના બંને હાથમાં તલવાર હતી. તે સંગીતાબેન તરફ આવતા તેમણે ગભરાઈને જાળી બંધ કરી દીધી હતી. આથી લાલુએ ઘર પર પથ્થરો ફેંકયા હતા અને ચંદને ગાળો આપતા સંગીતાબેને જોરથી બુમાબુમ કરી પોલીસને બોલાવો કહેતા જ ત્રણેય ભાગી ગયા હતા. આ બનાવને પગલે બંટીનો ભાઈ મહેંદ્ર ઉર્ફે પપ્પુ બંટી, કિશન ઉર્ફે ચકલી પરમાર, જયેશ ઉર્ફે બારકુ વાઘ, અમિત દુબે, વૈભવ પાટીલ, ગણેશ ઉર્ફે રાવસ્યા પાટીલ અને મિલિંદ કોળી સાથે ખુલ્લી તલવારો તથા ચપ્પુ રાખી હવામાં ફેરવતા બુમાબુમ કરતા નીકળ્યા હતા.
પોલીસે બંટીના બે સાગરીતોને જેલ ભેગા કર્યા
ત્યારબાદ ચિંતાચોક પાસે રાજ સુરેશ પાટીલ અને તેના મિત્રોને અહીં શું કરો છો? ભાગો અહીંથી તેમ કહી રાજ પર હુમલો કર્યો હતો .આ સાથોસાથ હવામાં ફાયરીગ પણ કર્યું હતું. આ ઘટનામાં ડિડોલી પોલીસે સાત વિરુદ્ધ ગુનો નોંધી તપાસ શરૂ કરી હતી. આ બનાવમાં ક્રાઇમ બ્રાંચે વૈભવ અને જયેશની ધરપકડ કરી હતી. નોંધનિય છે કે, જયેશ ખૂન, લૂંટ, મારામારી સહિતના 15 ગુનાઓ તેના પર નોંધાઇ ચુકયા છે. હાલ પોલીસે અન્ય આરોપીઓની શોધખોળ શરૂ કરી વધુ તપાસ હાથ ધરી છે. પુરી ઘટના બદલાની આગમાં ઘટી હોવાને લઇને ઉમેશની ગેંગે હુમલો કર્યો હતો આ માટે બંટી દયાવાનની ગેંગે ફરી ધમાલ મચાવી હતી. પોલીસે બંટીના બે સાગરીતોને જેલ ભેગા કર્યા છે. જયારે સામે પક્ષે આરોપીની શોધખોળ ચાલું હોવાનું સામે આવ્યું છે.