ખુશખબર / સુરતવાસીઓ માટે મહત્વના સમાચારઃ 4 વર્ષની રાહ જોયા પછી દેશના આ બે મોટા શહેરને જોડતી સીધી ફલાઇટ સેવા શરુ કરાશે

• સુરતથી વારાણસી અને પટનાની ફ્લાઇટ કરાશે શરૂ
• 12 જાન્યુઆરીથી 189 સીટની ફ્લાઇટ શરૂ કરાશે
• વેપાર અર્થે આવન-જાવન કરતા લોકોને રાહત થશે

સુરતના શહેરીજનો માટે નવા વર્ષમાં નવી બે ફલાઇટ શરુ કરવામાં આવી રહી છે. જેમાં સુરતથી વારાણસી અને પટનાની ફલાઇટ શરુ કરવામાં આવશે. આમ કોરોનાકાળ દરમિયાન આ બે શહેર વચ્ચે નવી ફલાઇટ શરુ કરવામાં આવતા વેપાર અર્થે આવન-જાવન કરતા લોકોને રાહત થશે. 
 

પ્રાપ્ત મળતી માહિતી મુજબ સુરતથી વારાણસી અને પટના માટે આગામી 12 જાન્યુઆરીથી 189 સીટીની ફલાઇટ શરુ કરાશે. જેમાં વારાણસી ફલાઇટ અઠવાડિયામાં 4 દિવસ તેમજ પટના માટે અઠવાડિયામાં 3 દિવસ ઉડાન  ભરશે. 

આમ છેલ્લા 4 વર્ષની રાહ જોયા બાદ સુરતથી ઉત્તર પ્રદેશ અને બિહાર માટે નોન સ્ટોપ ફલાઇટની શરુઆત થશે. સ્પાઇસ જેટ દ્વારા 12 જાન્યુઆરી વારાણસી અને પટના માટે આ ફલાઇટ શરુ કરવામાં આવી રહી છે. જ્યારે આ બંને રુટથી વાયા થઇને કોલકાતાની પણ ફલાઇટ શરુ થવા જઇ રહી છે. વારાણસી અને પટના માટે ફલાઇટ શરુ કરવાની માંગણી 4 વર્ષ પહેલા કરવામાં આવી હતી. 
 

ગત વર્ષે 24 ડિસેમ્બરના રોજ સૂરતથી સ્પાઇસ જેટની કોલકાતાની ફલાઇટને રદ્દ કરી દેવામાં આવી હતી. બંને રુટ પર 100 ટકા પેસેન્જર ટ્રાફિક મળવાની શક્યતાના પગલે કોલકાતા ફલાઇટને આ  બંને રુટથી વાયા જોડી દેવામાં આવી છે. 

સુરતથી વારાણસી અને પટના માટે ફલાઇટનું શરુઆતી ભાડુ 3500 રુપિયા હશે જ્યારે આ માત્ર શરુઆતી ભાડુ છે આગળ ટ્રાફિકને ધ્યાનમાં લઇને ભાડામાં વધારો પણ કરવામાં આવી શકે છે. 

સ્પાઇસ જેટ દ્વારા વારાણસીનું શિડયૂલ જાહેર

સ્પાઇસ જેટ દ્વારા સત્તાવાર શિડ્યૂલની જાહેરાત કરવામાં આવી છે. જેમાં સુરતથી વારાણસીની ફલાઇઠ અઠવાડિયામાં સોમ, બુધ, શુક્ર અને રવિવારના રોજ ઉડાન ભરશે. સુરતથી બપોરે 12.10 કલાકે ઉડાન ભરી બપોરે 13.50 વાગે વારાણસી પહોંચશે. 

સુરતથી પટના માટે શિડયુલ જાહેર

સુરતથી પટના માટે અઠવાડિયામાં મંગળ, ગુરુ અને શનિવારે ઉડાન ભરશે. સુરતથી બપોરે 12.10 વાગે ઉડાન ભરી બપોરે 2.40 કલાકે પટના પહોંચશે. 

સુરતથી કોલકાતા ફલાઇટ નિયમિત

સુરતથી કોલકાતા વચ્ચે ફલાઇટ નિયમિત હશે. સુરતથી કોલકાતા વાયા વારાણસી થઇને બપોરે 12 વાગે ઉડાન ભરે અને સાંજે 4 વાગે કોલકાતા પહોંચશે, જ્યારે સુરતથી વાયા પટના થઇને સાંજે 4.15 કલાકે કોલકાતા પહોંચશે. જ્યારે પરત માટે કોલકતાથી સવારે 9 વાગ્યે ઉડાન ભરીને 11.40 વાગે સુરત પહોંચશે.