સુરતના બારડોલી હાઈવે પર આવેલા પેટ્રોલ પંપ પર લૂંટની ઘટના સામે આવી છે. બે અલગ-અલગ બાઈક પર આવેલા ચાર જેટલા શખ્સોએ પેટ્રોલ પંપની ઓફીસમાં ચોરી કરી હતી. બંદુક અને છરા બતાવીને કર્મચારી અને સિક્યુરીટી ગાર્ડને બંધક બનાવીને લૂંટ ચલાવી હતી.
ઉલ્લેખનીય છે કે 15 હજાર રોકડા અને 2 મોબાઈલ મળી 20 હજારથી વધુની લુટ ચલાવીને લૂંટારૂઓ ફરાર થયા હતા. આ સમગ્ર ઘટના CCTVમાં કેદ થઈ હતી. આ ઘટનાની જાણ થતાં પોલીસકર્મીઓ ઘટના સ્થળે દોડી આવ્યા હતા. ત્યારે હવે પોલીસે CCTVના આધારે આરોપીઓની શોધખોળ શરૂ કરી છે.
આપને જણાવી દઇએ કે CCTVમાં દેખાઇ રહેલા આ ચારેય લૂંટારાઓ જે બાઈક લઇને આવ્યા હતા એ નંબરપ્લેટ વગરની બાઈક હતી અને મોઢા પર બુકાની બાંધેલી હતી. જોકે આવી જ ઘટના ગતરાત્રીના વલસાડ-વાપી ખાતે પણ બની હતી અને લૂટ કરવામાં આવી હતી ત્યારે હવે પોલીસ આ બંને પેટ્રોલ પંપના સીસીટીવી સરખાવી બંને લૂંટની ઘટનાને એકજ લૂંટારાઓએ અંજામ આપ્યો છે કે બંને ઘટના અલગ અલગ ગેંગ દ્વારા અંજામ આપવામાં આવ્યો છે. એ તપાસી લૂંટારાઓને પકડવા માટે મથામણ કરી રહી છે.