ગુજરાતમાં શાળાઓ તો શરૂ થઈ ગઈ છે પણ એક પછી એક માઠા સમાચાર સામે આવી રહ્યા છે. જૂનાગઢ બાદ સુરતમાં શાળા શરૂ થયા બાદ 2 શિક્ષક અને 3 વિદ્યાર્થી કોરોના પોઝિટિવ આવ્યા છે.
શાળાઓ શરૂ થતાં કોરોના કેસ સામે આવ્યા
97 સ્કુલ કોલેજમાં હેલ્થ ચેકીંગ કરાયું
2320 લોકોના ટેસ્ટીંગ કરતા 5 લોકો પોઝિટિવ
શાળાઓ શરૂ થતાં કોરોના કેસ સામે આવ્યા છે. સુરતની સ્કૂલોમાં કોરોના ટેસ્ટીંગ કરવામાં આવ્યું હતું. જેમાં 2 શિક્ષકો, 3 વિદ્યાર્થીઓનો રીપોર્ટ પોજિટિવ આવ્યો છે.
કેશોદ બાદ સુરતમાં પણ પોઝિટિવ કેસો સામે આવ્યાં છે. સુરતમાં આઠ ઝોનમાં 97 સ્કુલ કોલેજમાં હેલ્થ ચેકીંગ હાથ ધરવામાં આવ્યું હતું. તેમાં 2 હજાર 320 લોકોના ટેસ્ટીંગ કરતા 5 લોકોના કેસ પોઝિટિવ આવ્યાં હતાં.
જૂનાગઢમાં 11 વિદ્યાર્થીનીઓ પોઝિટિવ
જૂનાગઢના કેશોદની 11 વિદ્યાર્થિનીઓ કોરોના પોઝિટિવ આવ્યા બાદ પણ સ્કૂલો ચાલુ રાખવામાં આવી હતી. વિનય મંદિર શાળા સંચાલકોની બેદરકારી સામે આવી હતી. માત્ર રેપિડ ટેસ્ટ કરાવી મન મનાવી શૈક્ષણિક કાર્ય ચાલુ રાખવામાં આવી રહ્યું છે.
ગત 24 કલાક દરમિયાન કોરોનાના 471 નવા કેસ સામે આવ્યા છે. જેથી ગુજરાતમાં અત્યાર સુધીમાં 257813 દર્દીઓ નોંધાઇ ચૂક્યા છે. રાજ્યમાં કોરોનાથી સાજા થવાનો દર 96.17 ટકા થયો છે. અમદાવાદ શહેરમાં આજે 91 કેસ નોંધાયા છે. તો મહાનગરોમાં રાત્રિ કર્ફ્યુને લઇને કોરોનાનું સંક્રમણ ઘટ્યું છે અને આગામી 31 જાન્યુઆરી સુધી રાત્રિ કર્ફ્યુ યથાવત રહેશે.
રાજ્યમાં 6 હજારથી ઓછા એક્ટિવ કેસ
રાજ્યના સ્વાસ્થ્ય વિભાગ દ્વારા જાહેર કરવામાં આવેલી માહિતી અનુસાર, રાજ્યમાં આજે 727 દર્દી સાજા થયાં અને અત્યાર સુધીમાં કુલ 2,47,950 દર્દીઓ સાજા થયાં છે. તો હાલ 5491 એક્ટિવ કેસ છે. જેમાંથી 52 દર્દીઓ વેન્ટિલેટર પર છે.
ગુજરાતમાં આજે 1 દર્દીનું મોત
આજે કોવિડ-19થી અમદાવાદ કોર્પોરેશનમાં 1 દર્દીનું મોત થતા રાજ્યમાં કોરોનાથી મૃત્યુ પામનારાઓની સંખ્યા વધીને 4372 થઇ ગઇ છે.
રાજ્યમાં જાણો કેટલા કેસ નોંધાયા?
છેલ્લા 24 કલાકમાં અમદાવાદ શહેરમાં 91 કેસ, અમદાવાદ ગ્રામ્યમાં 4 કેસ, સુરત શહેરમાં 79, સુરત ગ્રામ્યમાં વધુ 12 કેસ, વડોદરા શહેરમાં 72, ગ્રામ્યમાં વધુ 24 કેસ નોંધાયા, રાજકોટ શહેરમાં 43 કેસ, રાજકોટ ગ્રામ્યમાં વધુ 16 કેસ, કચ્છમાં 10 કેસ નોઁધાયા છે.