સુરત / ઓય બાપા! ત્રીજા માળે ઊંઘેલો યુવક ગ્રાઉન્ડ ફલોર પર પટકાયો, રાંદેર પોલીસ લાઈનની જર્જરિત બિલ્ડિંગમાં સ્લેબ ધરાશાયી

• સુરતની રાંદેર પોલીસ લાઈનમાં સ્લેબ ધરાશાયી
• ત્રીજા માળના બેડરૂમનો સ્લેબ ધરાશાયી થતા યુવક પટકાયો
• જર્જરિત સ્થિતિમાં છે પોલીસ લાઈનની બિલ્ડિંગ

સુરતની રાંદેર પોલીસ લાઈનમાં ત્રણ માળના સ્લેબ ધરાશાયી થયા છે. ત્રીજા માળના બેડરૂમનો સ્લેબ ધરાશાયી થયાની ઘટના સામે આવી છે. જેથી ત્રીજા માળે ઊંઘી રહેલો યુવક પલંગ સાથે ધડામ દઇને ગ્રાઉન્ડ ફલોર પર પટકાયો હતો. પરંતુ સદનસીબે મોટી દુર્ઘટના ઘટતા-ઘટતા ટળી ગઇ છે. જો કે, યુવકને સામાન્ય ઈજાઓ જરૂરથી થઇ છે. જણાવી દઇએ કે, બિલ્ડિંગમાં 16માંથી 12 ફલેટમાં લોકો રહે છે. મહત્વનું છે કે, હાલમાં પોલીસ લાઈનની બિલ્ડિંગ જર્જરિત સ્થિતિમાં જોવા મળી રહી છે.

ત્રીજા માળે ઊંઘી રહેલો યુવક પલંગ સાથે ગ્રાઉન્ડ ફલોર પર પટકાયો

મહત્વનું છે કે, રાંદેર પોલીસ લાઇનના ત્રીજા માળના બેડરૂમનો સ્લેબ ધરાશાયી થતા ત્રીજા માળે ઊંઘી રહેલો યુવક પલંગ સાથે ધડામ દઇને ગ્રાઉન્ડ ફલોર પર પટકાયો હતો. જો કે, સદનસીબે તેને માત્ર સામાન્ય ઇજાઓ થઈ હતી.

પરંતુ આ મામલે ફાયરવિભાગને સમયસર જાણ કરવામાં આવતા ફાયરટીમ તુરંત ઘટનાસ્થળે પહોંચી ગઇ હતી. બાદમાં ફાયર વિભાગ દ્વારા તમામ કાટમાળને દૂર કરવામાં આવ્યો. જો કે, આ ઘટના બનતા બિલ્ડિંગમાં રહેતા પોલીસ કર્મચારીના પરિવારજનો ભયમાં મૂકાયાં હતા.

રાંદેર પોલીસ લાઇનના ક્વાર્ટસ જર્જરિત સ્થિતિમાં

છેલ્લાં ઘણા સમયથી રાંદેર પોલીસ લાઇનના ક્વાર્ટસ જર્જરિત સ્થિતિમાં છે. ગમે ત્યારે સ્લેબના પોપડાં નીચે ખરી જાય તેવી સ્થિતિના મકાનોમાં આ પોલીસ કર્મીઓ રહે છે. ત્યારે આવી સ્થિતિમાં ગંભીર ઈજા થાય તેવી પૂરેપૂરી શક્યતાઓ આ પોલીસ લાઇનના ક્વાર્ટસમાં રહેલી છે.