સુરતઃ રાજ્યમાં વરસાદ પોતાનું આગમન કરી રહ્યો છે ત્યારે સુરતમાં વરસાદની ધમાકેદાર એન્ટ્રી થઈ હતી. જીલ્લાના રાંદેર અડાજણ સહિતના કેટલાક વિસ્તારોમાં વરસાદ વરસ્યો હતો.
ત્યારે શહેરમાં પ્રથમ વરસાદમાં બાળકો ભિંજાઈને પોતાની ખુશી વ્યક્ત કરી હતી. તો બાળકો સહિત મહિલાઓએ પણ વરસાદનો લ્હાવો લીધો હતો. રાજ્યમાં આગામી 24 કલાકમાં ભારે વરસાદની આગાહી હવામાન વિભાગે કરી હતી.
વલસાડમાં ધોધમાર વરસાદ
વલસાડ જિલ્લામાં વીજળીના કડાકા સાથે ભારે વરસાદ થયો. જિલ્લામાં વરસાદની તોફાની બેટિંગ જોવા મળી. શહેરમાં મોડી રાતે 2.5 ઈંચ વરસાદ નોંધાયો છે. તો મોગરાવાડીમાં ગરનાળામાં પાણી ભરાતા વિદ્યાર્થીઓ અને વ્યવસાયીઓ અટવાયા હતા.
વલસાડ જિલ્લામા વરસાદની શરૂઆત થઈ છે. વરસાદ આવતા ખેડૂતોમાં ખુશીનો માહોલ જોવા મળ્યો છે. ભારે વીજળીના કારણે વરસાદ આવતા વાપીમાં વીજળી બંધ થઈ હતી. ધોધમાર વરસાદ આવતા વાતાવરણમાં ઠંડક પ્રસરી હતી.