દેહવ્યાપાર / સુરતમાં સ્પા સામે ત્રણ દિવસથી મેગા ઑપરેશન, 12થી વધુ રેડ, 4 કૂટણખાના ઝડપાયા

• સુરતમાં કૂટણખાનાનો ઠેર ઠેર ગોરખધંધો 
•  સ્પાના નામે ચાલી રહ્યો છે દેહવ્યાપાર
• ભટાર અને વરાછા વિસ્તારમાં પોલીસની કડક કાર્યવાહી

છેલ્લા ઘણા સમયથી ગુનાહિત પ્રવૃત્તિઓમાં સુરતનું નામ મોખરે થઇ રહ્યુ છે. હત્યા, દુષ્કર્મ સહિતની ઘટનાઓ બાદ દેહવ્યાપારના ધંધા ચાલી રહ્યા હોવાનું પોલીસની સામે આવ્યું છે. પરિણામે છેલ્લા 3 દિવસથી પોલીસ દ્વારા કૂટણખાના વિરુદ્ધ વિશેષ ઝુંબેશ શરુ કરવામાં આવી છે. ત્યારે ઉમરા પોલીસ સ્ટેશનની હદ વિસ્તાર બાદ આજે સુરત પોલીસ દ્વારા  ભટાર અને વરાછા વિસ્તારમાં કડક કાર્યવાહી હાથ ધરવામાં આવી.

વધુ 4 કૂટણખાના ઝડપી પાડ્યા 

સુરત પોલીસ દ્વારા સ્પાના ઓથા હેઠળ ચાલતા વધુ 4 કૂટણખાના ઝડપી પાડ્યા છે.  ભટાર અને વરાછા વિસ્તારમાં પોલીસ દ્વારા કાર્યવાહી કરવામાં આવી હતી. પોલીસે સ્પા પર દરોડા પાડીને 20થી વધુ લોકોની ધરપકડ કરીને કાયદેસરની કાર્યવાહી હાથ ધરવામાં આવી છે.  મહત્વનું છે કે સુરત પોલીસે છેલ્લા ત્રણ દિવસથી સુરતમાં સ્પેશિયલ ડ્રાઇવ શરુ કરી છે. જે અંતર્ગત શહેરમાં ચાલી રહેલા  આવા ગોરખધંધા સામે લાલ આંખ કરીને અત્યાર સુધીમાં 12થી વધુ સ્પા સેન્ટર પર દરોડા પાડવામાં આવ્યા છે. 

 આ સ્પા સેન્ટર પર પોલીસના દરોડા 

• નિશા સ્પા
• ન્યૂ ઇન્ડિયા સ્પા
• બ્લૂ આઇસ સ્પા
• એસ.પી સ્પા

23મેએ 4 સ્પા સેન્ટર પર દરોડા

સુરત ક્રાઈમ બ્રાન્ચ હેઠળ ચાલતી સાયબર સેલના મિસિંગ સેલ દ્વારા 23મેના રોજ  વેસુ વીઆઈપી રોડ રઘુવીર બિઝનેસ પાર્કમાં થાયા સ્પા નામની શોપમાં દરોડા પાડવામાં આવ્યા હતા અને મસાજના નામે વિદેશી તથા ભારતીય મહિલાઓ રાખીને ગ્રાહકો પાસેથી રૂપિયા લેવાતા હતા અને ગ્રાહકોને શરીર સુખ માણવાની સવલત પણ પૂરી પાડવામાં આવતી હતી.  પોલીસે દરોડા પાડી સ્પા ના માલિકો ભાવેશ અને અનિલ તેમજ સંચાલક જીરાપત નેબકલંગ, મેનેજર મુકેશકુમાર તેમજ ગ્રાહકો ચેતન પટેલ વિમલશાહ પૂર્ણ સિંહ રાજપુરોહિત હરેશ કુકડીયા અમિત પટેલની અટકાયત કરી હતી. એટલું જ નહીં આ સ્પામાં વિદેશી મહિલાઓ મોકલનાર લમાંઈ ઉર્ફે smiley ચીમ ખોંબુરીની વોન્ટેડ જાહેર કરવામાં આવી છે.  પોલીસે આ સ્પામાંથી 10600 રૂપિયા રોકડા 9 મોબાઇલ ફોન સહિતની મત્તા કબજે કરી હતી.

પોલીસની કાર્યવાહીથી સ્પા સંચાલકોમાં ફફડાટ

સુરત પોલીસ દ્વારા સ્પાના નામે ચાલી રહેલા કૂટણખાના વિરુદ્ધ સ્પેશિયલ ડ્રાઇવ ચલાવતા સ્પા સંચાલકોમાં ડરનો માહોલ જોવા મળી રહ્યો છે. સુરતમાં દિવસ જાય તેમ નવા નવા કૂટણખાના ઝડપાઇ રહ્યા છે ત્યારે આગામી સમયમાં હજુ પણ આવા ફેક સ્પા સેન્ટર ઝડપાય તો કોઇ નવાઇ નહી.  સુરત પોલીસ  આવા ગોરખધંધા કરનાર સામે કડકમાં કડક કાર્યવાહી હાથ ધરી રહી છે.