જાહેરનામું / Free WiFiથી શંકાસ્પદ સામગ્રી ડાઉનલોડ કરનારાની હવે ખેર નહીં, સુરત પોલીસે બહાર પાડ્યું જાહેરનામું

• હોટલોમાં ફ્રી વાઇફાઇથી ડાઉનલોડ કરનારા પર પોલીસની નજર
• શંકાસ્પદ સામગ્રી ડાઉનલોડ કરનારાની માહિતી આપવાના આદેશ
• દેશમાં આંતકી ગતિવિધિઓને ધ્યાનમાં રાખી CPનું જાહેરનામું

દેશમાં આંતકી ગતિવિધિઓને ધ્યાનમાં રાખી સુરત પોલીસ કમિશનર અજય તોમરે જાહેરનામું બહાર પાડ્યું છે. પોલીસ કમિશનરે શંકાસ્પદ સામગ્રી ડાઉનલોડ કરનારાની માહિતી પોલીસને આપવાના આદેશ આપ્યા છે. હોટેલ્સના સંચાલકોને પોલીસ કમિશનરે આદેશ આપ્યો છે. સુરત પોલીસ કમિશનરે સીમકાર્ડ વિક્રેતાઓને પણ આદેશ આપ્યા છે. એક કરતા વધારે સીમકાર્ડ ખરીદનારાની માહિતી આપવા પોલીસે આદેશ આપ્યા છે. મહત્વનું છે કે વર્ષ 2022માં ડિંડોલીના યુવકે ફ્રી વાઇફાઇનો ઉપયોગ કરી પાકિસ્તાની એજન્ટ સાથે વાત કરી હતી અને પાકિસ્તાની જાસૂસને ડેટા આપવાનો પ્રયાસ કર્યો હતો.

ગત ડિસેમ્બરમાં ISI એજન્ટની કરાઈ હતી ધરપકડ
સુરત શહેર ક્રાઈમ બ્રાન્ચને પાકિસ્તાની એજન્સી ISIના સંપર્કમાં રહેલા એક ઈસમની ધરપકડ કરવામાં મોટી સફળતા મળી હતી. સુરતમાં રહેતા દિપક સાળુંકે નામના ઇસમની ક્રાઈમ બ્રાન્ચે ધરપકડ કરી હતી. જે બાદ તેને કોર્ટમાં રજૂ કરીને 14 દિવસના રિમાન્ડની માંગ કરાઈ હતી. કોર્ટ દ્વારા મંગળવાર સુધીના છ દિવસના રિમાન્ડ મંજૂર કરવામાં આવ્યા હતા. દિપક સાળુંકેની પૂછપરછમાં ચોંકાવનારા ખુલાસા થયા હતા.

પોલીસની પૂછપરછમાં થયા હતા ચોંકાવનારા ખુલાસા 
પોલીસે જણાવ્યું હતું કે,  સુરત ક્રાઈમ બ્રાન્ચને સુરતના ડીંડોલી વિસ્તારમાં રહેતો દિપક સાળુંકે નામનો વ્યક્તિ પાકિસ્તાની એજન્સી ISIના એજન્ટ સંપર્કમાં રહી દેશ વિરોધી પ્રવૃત્તિ કરતો હોવાની માહિતી મળી હતી. જે બાદ ટીમે ગત 13 ડિસેમ્બરના રોજ ડીંડોલી વિસ્તારમાં આવેલી યોગેશ્વર પાર્ક સોસાયટીમાંથી દિપક સાળુંકેની ધરપકડ કરી હતી. પોલીસે ગત 14 ડિસેમ્બરના રોજ દીપક સાળુંકેના રિમાન્ડ મેળવવા માટે જુદા જુદા પ્રકારના બાર જેટલા મુદ્દાઓ કોર્ટ સમક્ષ રજૂ કર્યા હતા. સુરત સેશન કોર્ટે આરોપીના મંગળવાર સુધીના 6 દિવસના રિમાન્ડ મંજૂર કર્યા હતા.

ભારતીય સેનાની આપી હતી સંવેદનશીલ માહિતી
પોલીસે જણાવ્યું હતું કે, તેની પૂછપરછમાં સામે આવ્યું હતું કે, દિપક પૂનમ શર્મા નામના સોશિયલ મીડિયા એકાઉન્ટમાં વાતચીત કરતા સમયે પાકિસ્તાનના હમીદ નામના ઈસમના સંપર્કમાં આવ્યો હતો અને ત્યારબાદ હમીદે પોતે પાકિસ્તાનનો હોવાનું અને ISI માટે કામ કરતો હોવાનું દિપક સાળુંકેને જણાવ્યું હતું. ત્યારબાદ હમીદે દિપકને ભારતીય સીમકાર્ડ આપવાનું જણાવ્યું હતું અને દિપકે ભારતીય સીમકાર્ડ હમીદને આપ્યા હોવાની વાત પણ સામે આવી હતી. ત્યારબાદ આરોપી બે જુદા-જુદા મોબાઈલ નંબરથી તેની સાથે વોટ્સએપ પર અને ફેસબુક મારફતેથી દેશની ભારતીય સેના અંગેની કેટલીક અતિગુપ્ત સંવેદનશીલ માહિતીઓ આપી હતી.

ધરપકડ પહેલા વોટ્સએપ ચેટ કરી દીધી હતી ડિલીટ
આ ઉપરાંત દીપકે રાજસ્થાનના પોખણના આર્મી બેઝના ફોટો પણ હામિદને મોકલ્યા હતા. તેમજ પોખરણ ખાતેની આર્મી મુવમેન્ટ જણાવવા બદલ તેણે રૂપિયા લીધા હતા અને ધરપકડ પહેલા તેણે  કુલ 75,856 રૂપિયા એકાઉન્ટમાં પ્રાપ્ત કર્યા હતા. જોકે,  પોલીસ ધરપકડ પહેલા તેણે તમામ વોટ્સઅપ ચેટ ડિલીટ કરી દીધી હતી. આરોપીએ ફ્રી વાઇફાઇનો ઉપયોગ કરી પાકિસ્તાની એજન્ટ સાથે વાત કરી હતી અને આ ડેટા મોકલ્યો હતો.

સુરત પોલીસે કરી હતી તપાસ તેજ
દીપક ક્રિપ્ટો કરન્સી એક્સચેન્જર ‘BINANCE’માં એકાઉન્ટ ધરાવતો હતો તેમજ પાકિસ્તાની હમીદે દીપકને 226 USDT ક્રિપ્ટો કરન્સી મોકલી હતી. સાથે જ ક્રિપ્ટો કરન્સી મોકલનાર મહંમદ નામના વ્યક્તિનું નામ પોલીસ તપાસમાં ખુલ્યુ હતું.  સુરતમાં ISI એજન્ટ પકડાવવાના મામલે તપાસ તેજ કરવામાં આવી હતી. ISI એજન્ટ દીપક સાળુંકેને રૂપિયા મોકલનારની પૂછપરછ કરાઈ હતી.  નૂર વહાબ નામની યુવતીની સુરત પોલીસે પૂછપરછ હતી. જેમાં ISIના ઈશારે દીપકને 6 વખત નૂરે રૂપિયા મોકલ્યા હોવાનું સામે આવ્યું હતું. તે દીપકને જેમ ફેસબૂક પર હવાલા  હુંડી ગ્રુપમાં હતી. નૂર ફેસબૂક પર પેજ ડેવલોપરનું કામ કરતી હતી. તે પાકિસ્તાનના ગ્રાહકોને પેજ બનાવી આપતી હતી.