શહેરમાં સેવા, શાંતિ, સુરક્ષા જાળવવાનું કાર્ય પોલીસનું હોય છે.. ત્યારે પોલીસ દ્વારા પોતાની ફરજો ઉપરાંત પણ અનેકવાર માનવતાના ધોરણે કામગીરી કરતા જોવા મળે છે. ત્યારે આજે સુરતમાં ટીઆરબી જવાન અને ટ્રાફિક પોલીસની પણ આવી જ કામગીરી જોવા મળી.
બાઇક ચાલકને ખેંચ આવતા મદદે દોડી આવ્યા
સુરતના સીમાડા ચાર રસ્તા પાસેની આ ઘટના છે. બાઇક ચાલકને અચાનક જ ખેંચ આવતા પોલીસ દોડતી આવી પહોંચી. તેના પગ અને હાથના તળિયા ઘસવા માંડ્યા. આસપાસના લોકો પણ ભેગા થઇ ગયા હતા. જો કે ટ્રાફિક પોલીસે સમયસૂચકતા દાખવીને બાઇક ચાલકને હોસ્પિટલ પહોંચાડ્યો. પોઇન્ટ પર હાજર પોલીસકર્મીઓ અને ટીઆરબીના જવાન દ્વારા તાત્કાલિક મદદે દોડી આવતા યુવાનને તાત્કાલિક સારવાર મળી રહેવા પામી હતી.
108 બોલાવીને લઇ જવાયા હોસ્પિટલ
મહત્વનું છે કે સુરતના સરથાણામાં રિજિયન-1માં ફરજ બજાવતા ટ્રાફિક પોલીસ કોન્સ્ટેબલ સકતા નરસંગભાઇ તેમજ અન્ય સ્ટાફ કામગીરીમાં હતા. તે સમયે
સીમાડા ચાર રસ્તા પાસે રાકેશભાઇ નામના વ્યક્તિને બાઇક ચલાવતાં સમયે ખેંચ આવતા તેઓ નીચે પડી ગયા હતા. આ સમય દરમિયાન હાજર ટ્રાફિક પોલીસના કર્મચારીઓએ તાત્કાલિક 108 બોલાવીને રાકેશભાઇને સ્મીમેર હોસ્પિટલમાં સારવાર માટે મોકલી આપ્યા હતા.