છેલ્લાં 10 વર્ષમાં સજ્જુ કોઠારીએ આ તમામ મિલકતો વસાવી હતી
પોલીસને આરોપીની મકાન અને દુકાન સહિત કુલ 12 મિલકતો મળી આવી
સુરતમાં ગુજસીટોક (GUJCTOC) આરોપી સજ્જુ કોઠારી વિરૂદ્ધ વધુ એક ગાળીયો કસાયો છે. સુરત પોલીસે આરોપી સજ્જુ કોઠારીની 20 કરોડથી વધુ મિલકતો પોલીસે શોધી કાઢી છે. છેલ્લાં 10 વર્ષમાં સજ્જુ કોઠારીએ આ તમામ મિલકતો વસાવી હતી. સજ્જુ કોઠારીએ પોતાના નામે અને પત્ની-બાળકોના નામે મિલકતો વસાવી છે. જે મિલકતો સામે આવી તેમાં મકાન અને દુકાન સહિત કુલ 12 મિલકતો મળી આવી છે. જો કે, હવે પોલીસ આ મામલે ગુજસીટોક કોર્ટને રિપોર્ટ કરશે. રિપોર્ટ કર્યા બાદ મિલકત જપ્તીની કાર્યવાહી હાથ ધરાશે.
સજ્જુ કોઠારી ગુજસીટોક સહિતના અનેક ગુનાનો આરોપી છે
ઉલ્લેખનીય છે કે, સજ્જુ કોઠારી પર સુરતમાં હત્યા, હત્યાની કોશિશ તથા બિલ્ડરો પાસેથી ખંડણી ઉઘરાવવા, સરકારી જમીનો પર કબજો કરવા અને પોલીસ પર હુમલો તથા ગુજસીટોકના ગુના નોંધાયેલા છે. સજ્જુ કોઠારી ગુજસીટોક સહિતના અનેક ગુનાનો આરોપી છે.
સજ્જુ કોઠારી તેના નાનપુરા જમરૂખ ગલીના બંગલામાં બનાવેલ ગુપ્ત રૂમમાંથી પોલીસના હાથે ઝડપાયો હતો. સૂત્રો પાસેથી પ્રાપ્ત માહિતી મુજબ નાનપુરા જમરૂખગલી ખાતે રહેતા કુખ્યાત સાજીદ ઉર્ફે સજજુ કોઠારી સામે શહેરના વિવિધ પોલીસ સ્ટેશનમાં હત્યાની કોશિશ તેમજ ખંડણી ઉઘરાવવા અને જુગારની ક્લબ ચલાવવા ઉપરાંત થોકબંધ ગુનાઓ નોંધાયેલા હોવાનું સામે આવ્યું છે.
ભૂતકાળમાં રાંદેર પોલીસ દ્વારા અટકાયત કરવાનો પ્રયાસ હાથ ધરાયો હતો
તમને જણાવી દઇએ કે, ભૂતકાળમાં રાંદેર પોલીસ દ્વારા લાજપોર જેલમાંથી બહાર નીકળતી વખતે તેની અટકાયત કરવાનો પ્રયાસ હાથ ધરવામાં આવ્યો હતો. જો કે, આ દરમિયાન તે સ્થાનિક ફરજ પર હાજર PSI સહિતના સ્ટાફ પર હુમલો કરીને ફરાર થવામાં સફળ થયો હતો. તો સજ્જુ સામે ગુજસીટોકનો ગુનો પણ દાખલ થયેલો છે.