અગ્નિકાંડ / જ્ઞાનગંગા શાળા નજીક લાગેલી આગ મામલે સુરત પોલીસ કમિશ્નરે આપ્યું નિવેદન

સુરતમાં ભટાર રોડ પર આવેલ બાલકૃષ્ણ કોમ્પેક્ષની બાજુમાં પ્લાસ્ટિકના ગોડાઉનમાં આગ લાગી હતી. જે સમયે કોમ્પલેક્ષની અંદર શાળા ચાલુ હતી. શાળાની અંદર 150 વિદ્યાર્થીઓ તે સમયે અભ્યાસ કરી રહ્યા હતા. પરંતુ એકાએક આગ લાગતા અફરા-તફરી મચી ગઈ હતી. બાળકોમાં ભય ફેલાયો હતો અને દોડધામ મચી ગઈ હતી.

જોકે ઘટના અંગે જાણ થતા જ તાત્કાલીક ફાયર બ્રિગેડની ટીમ દોડી આવી હતી. વિદ્યાર્થીઓનું રેસ્ક્યું કરાયું હતું. તેમજ ફાયર વિભાગ દ્વારા સ્કૂલને સીલ કરવામાં આવી હતી.

સુરત પોલીસ કમિશ્નરનું નિવેદન

સમગ્ર મામલે સુરત પોલીસ કમિશનર સતિષ શર્માએ નિવેદન આપ્યુ હતુ. જેમાં તેમણે સ્કૂલ માન્યતા પ્રાપ્ત હોવાની વાત કરી હતી. તો જ્યાં આગ લાગી તે સ્થળથી બાળકો દુર હતા. બાળકોને સલામત બહાર ખસેડાયા હતા તેવી વાત પણ કરી હતી. તેમજ શાળા પાસે ફાયરની NOC છે કે નહીં તેની તપાસ કરી યોગ્ય કાર્યવાહી કરવાની બાંહેધરી આપી હતી.

JCP જી.એન.પટેલે સ્થળ મુલાકાત લીધી

ત્યારે આ સમગ્ર મામલે તપાસ કરવા સુરતના JCP જી.એન.પટેલે સ્થળ મુલાકાત કરી હતી. પોતાની પ્રતિક્રિયા આપી હતી. જેમાં તેમણે કહ્યું કે નિષ્કાળજી અંગે તપાસ કરવામાં આવશે. તથા FSLના રિપોર્ટના આધારે યોગ્ય કાર્યવાહી કરવાની બાંહેધરી આપી હતી.

શિક્ષણમંત્રીનું નિવેદન

સુરતમાં વધુ એક આગકાંડની ઘટના સામે આવી છે. ત્યારે આ ઘટનાની ગંભીરતાને જોતા શિક્ષણ મંત્રી ભૂપેન્દ્રસિંહ ચૂડાસમાએ પ્રતિક્રિયા આપતા કહ્યું કે, આગ શાળામાં નહી ફેક્ટરીમાં લાગી હતી. બાળકોને સલામત રીતે બહાર કઢાયા હતા. જવાબદારોને છોડવામા નહીં આવે.

નાયબ મુખ્યમંત્રીનું નિવેદન

નાયબ મુખ્યમંત્રીએ જણાવ્યું કે, સુરતમાં સ્કૂલની બાજુના ગોડાઉનમાં આગની ઘટના અંગે તપાસ કરાવાશે. સ્થાનિક તંત્ર પાસેથી ખુલાસો માંગવામાં આવશે. તક્ષશિલાની ઘટના બાદ તમામ નિયમો અનુસરવા સુચના અપાઇ હતી.

પરેશ ધાનાણીએ સરકાર પર પ્રહાર

સુરતમાં ભટાર રોડ પર પ્લાસ્ટિકના ગોડાઉનમાં આગનો મામલે વિપક્ષના નેતા પરેશ ધાનાણીએ સરકાર પર પ્રહાર કર્યા હતા,. તેમણે જણાવ્યું કે, સુરતની એક ઘટના ભુલાઈ નથી ત્યારે બીજી ઘટના બની છે. ભટારમાં બનેલ ઘટનાથી 250 બાળકોના જીવ જોખમમાં મુકાયો હતો. તેમ છતા તંત્રના પેટનું પાણી પણ હલ્યું ન હતું..સરકારની બેદરકારીને કારણે બાળકોના જીવ જોખમમાં મુકવાનો ખેલ ચાલી રહ્યો છે.