પ્રધાનમંત્રી નરેન્દ્ર મોદી દ્વારા 21 દિવસના લોકડાઉનની જાહેરાતના પગલે દેશભર સહિત ગુજરાતમાં તેનો કડક અમલ કરાવામાં આવી રહ્યો છે. રાજ્યમાં અનેક જિલ્લાઓમાં પોલીસ દ્વારા અલગ-અલગ કાર્યવાહી કરવા લોકોને અમલવારી કરવાની અપીલ કરવામાં આવી રહી છે. જો કે હવે સુરતમાં લોકડાઉનનો કડક અમલ કરવા માટે ડ્રોનનો ઉપયોગ કરવામાં આવશે.
સુરત શહેરની ગલીઓમાં ડ્રોન કેમેરા દ્વારા ચેકિંગ કરાશે
અંદરના રસ્તાઓ પર લોકોના ટોળા વિખેરવા ડ્રોનનો ઉપયોગ કરાશે
ડ્રોન ટેસ્ટિંગ કરાતાં શહેરમાં 6 સ્થળે ટોળાં જોવા મળ્યાં
ગુજરાતમાં અનેક જિલ્લાઓમાં લોકડાઉનની જાહેરાત કરાયાં બાદ પણ લોકો ઘણી વખત કોઇ કામ વગર બહારી આવે છે. જેને પોલીસ દ્વારા ક્યારેક સમજદારીથી તો ક્યારેક કડક અમલ દ્વારા પરત મોકલવામાં આવે છે.
તંત્ર દ્વારા જીવનજરૂરિયાતની ચીજવસ્તુઓને લઇને વારંવાર જાહેરાત કરવામાં આવે છે. જેમ કે શાકભાજી, દૂધ, અનાજ કોઇ ચીજવસ્તુઓની રાજ્યમાં તંગી નહીં સર્જાય તેવું તંત્ર વારંવાર પ્રજાને જણાવી ઘરમાં રહેવા અપીલ કરવામાં આવી રહી છે.
જો કે સુરતમાં હવે તંત્ર દ્વારા હવે લોકડાઉનનો કડક અમલ કરાવવા માટે ડ્રોનનો ઉપયોગ કરવાનું વિચાર્યું છે. ડ્રોનની મદદથી શહેરની અંદરના રસ્તાઓ પર જમા થયેલા લોકોના ટોળાંને વિખેરી શકાશે. વારંવાર તંત્ર દ્વારા લોકોને બહાર ન આવવા કરવામાં આવી રહેલી અપીલ છતાં લોકો કોઇ કારણ વગર ઘરની બહાર આવી રહ્યાં છે.
સુરતમાં તંત્ર દ્વારા કરવામાં આવેલા ડ્રોન ટેસ્ટિંગમાં શહેરમાં 6 સ્થળો પર ટોળાં જોવા મળ્યાં. આ ડ્રોનના કેમેરાથી 500 મીટરના દાયરામાં તપાસ કરવામાં આવશે. જો કે સુરત શહેરમાં આમ તો જનતા દ્વારા લોકડાઉનનો કડક અમલ કરવામાં આવી રહ્યો છે.