ગુજરાતમાં કોરોના વાયરસના વધતા કહેર વચ્ચે સુરત શહેરમાં મનપાના આરોગ્ય ખાતાની બેદરકારી સામે આવી રહી છે. ત્યારે કોરોનાને લઇને તંત્રની કાર્યવાહી પર ફરી સવાલો ઉઠી રહ્યાં છે. કેમ કે શહેરમાં એક યુવકે ત્રણ અલગ-અલગ ઝોનમાં કોરોનાનો રિપોર્ટ કરાવતાં તમામ જગ્યા પર અલગ-અલગ રિપોર્ટ સામે આવ્યો છે. જેમાં એક સ્થાન પર પોઝિટિવ જ્યારે બીજી જગ્યા પર આ જ યુવકનો રિપોર્ટ નેગેટિવ આવ્યો છે.
સુરત મહાપાલિકાના આરોગ્ય વિભાગનો આ કેવો વહીવટ?
એક જ વ્યકિતના એક જ દિવસના કોરોના રિપોર્ટ અલગ-અલગ
ઉધના ઝોનમાં કોરોના રિપોર્ટ પોઝિટીવ આવ્યો
અઠવા ઝોનમાં કોરોના રિપોર્ટ નેગેટીવ આવ્યો
સુરતમાં કોરોનાના વધતા કેસ વચ્ચે સુરત મનપાના આરોગ્ય ખાતાની મોટી બેદરકારી સામે આવી છે. જેમાં એક યુવકે સુરત મનપાના અલગ-અલગ ઝોનમાં રિપોર્ટ કરાવ્યો અને તમામ જગ્યા પર અલગ-અલગ રિપોર્ટ આવ્યો છે. મનપામાં અલગ-અલગ 3 સ્થાને રિપોર્ટ કરવામાં આવ્યો હતો. જેમાં એક સ્થાન પર પોઝિટિવ તો બીજા બે સ્થાન પર નેગેટિવ આવ્યો છે.
આમ છતાં તંત્ર દ્વારા આ યુવાન અને તેના પરિવારને ક્વૉરન્ટાઇન કરવામાં આવ્યા છે. સુરતના મગદલ્લા ગામમાં રહેતા સુનિલ ભાઇએ પહેલા ઉધના ઝોનના હેલ્થ સેન્ટરમાં ગયા ત્યાં ચેકઅપ કરનાર દ્વારા પૂછાયેલા આરોગ્યલક્ષી સવાલોના જવાબ તેમણે આપ્યા હતા. ડાયાબિટીસ, સુગર જેવી કોઈ તકલીફ સુનિલભાઈને ન હતી. તેમને કોરોનાના લક્ષણો પણ ન હતા.
આ બધી જ બાબતો તેમણે જણાવી હતી. જોકે જ્યારે રિપોર્ટ આવ્યો ત્યારે તેઓ ચોંકી ગયા હતા. કારણ કે તેમનો કોરોના રિપોર્ટ પોઝિટિવ આવ્યો હતો. જ્યારે તેઓ વેસુ ખાતે આવેલા હેલ્થ સેન્ટર ખાતે ગયા અને ત્યાં રિપોર્ટ કરાવતા ત્યાં રિપોર્ટ નેગેટિવ આવ્યો હતો.
જો આ યુવકે પોતાના ઘર પાસે આવેલ ધન્વંતરી રથમાં પણ ચેકીંગ કરાવતા ત્યાં પણ રિપોર્ટ નેગેટિવ જ આવ્યો છે. જોકે પાલિકાએ સુનિલભાઇને હોમ ક્વૉરન્ટાઇન કરી દેતા તેમની મુશ્કેલીમાં વધારો થયો છે. ત્યારે સવાલ ઉઠી રહ્યા છે કે સુરત મનપા આરોગ્ય વિભાગનો આ કેવો વહીવટ?
સળગતા સવાલ
સુરત મનપા આરોગ્ય વિભાગનો આ કેવો વહીવટ?
એક જ વ્યક્તિના કોરોના રિપોર્ટ અલગ-અલગ કેવી રીતે આવી શકે?
એક ઝોનમાં પોઝિટિવ અને બીજામા નેગેટિવ રિપોર્ટ કેવી રીતે આવી શકે?
સુરત મનપાની બેદરકારીથી આવા કેટલા પોઝિટિવ રિપોર્ટ નેગેટિવમાં ગયા હશે?
હજુ આવા કેટલા વ્યક્તિને પોઝિટિવ હોવા છતા નેગેટિવ રિપોર્ટ આવ્યા હશે?
કેટલા એવા નેગેટીવ રિપોર્ટ હશે જે પોઝિટિવ થઈ ગયા હશે?
શું સુરત મનપાની આ બેદરકારીના કારણે જ સંક્રમણ વધ્યું છે?