સુરતમાં નગર પ્રાથમિક શિક્ષણ સમિતિ માટે બનશે 22 કરોડની અદ્યતન શાળા, આંજણા વિસ્તારમાં નિર્માણ પામશે આ શાળા
સુરતમાં બનશે અદ્યતન શાળા
22 કરોડના બનશે હાઇટેક શાળા
શાળામાં હશે લિફ્ટની સુવિધા
સૌ ભણે સૌ આગળ વધે. આ સૂત્ર હેઠળ ગુજરાતમાં શૈક્ષણિક કામગીરી કરવામાં આવી રહી છે. સરકારી શાળાનું નામ પડે એટલે લોકોના નાકના ટેરવા ચઢી જાય પરંતુ રાજ્યમાં એવી પણ ઘણી સરકારી શાળાઓ છે જેમાં એડમિશન લેવા માટે વિદ્યાર્થીઓએ રાહ જોવાનો વારો આવે છે. કારણ કે આજની શાળાઓ હાઇટેક બની રહી છે. ત્યારે સુરતમાં 22 કરોડના ખર્ચે અદ્યતન શાળા બનવા જઇ રહી છે.
શાળામાં લિફ્ટની સુવિધા
સુરત મહાનગર પાલિકાની નગર પ્રાથમિક શિક્ષણ સમિતિ માટે 22 કરોડના ખર્ચે અદ્યતન શાળા બનાવાશે. લિંબાયતના આંજણા વિસ્તારમાં આ શાળાનું નિર્માણ કરવામાં આવશે. આ એવી શાળા હશે જેમાં લિફ્ટની સુવિધા હશે. સૌ પ્રથમવાર આવી શાળા બની રહી છે જેમાં લિફ્ટ હોય. 29 ક્લાસરૂમ ધરાવતી 5 માળની નવી શાળા બનશે.
સુમન શાળાનું પણ થશે નિર્માણ
22 કરોડની અદ્યતન શાળાની સાથે સાથે સુમન શાળાનું પણ નિર્માણ કરવામાં આવશે. જેમાં ફિઝિક્સ, કેમેસ્ટ્રી અને બાયોલોજીની અદ્યતન લેબ બનશે. સાથે સાથે 900 વ્યક્તિઓનો સમાવેશ થાય તેવો મલ્ટીપર્પઝ હોલ પણ બનશે. . આ શાળાનું નિર્માણ ક્યારે થશે, કેટલા સમય સુધીમાં શાળા બનશે તે વગેરે બાબતો હજી સામે આવી નથી પરંતુ સુરતમાં અદ્યતન શાળાનું નિર્માણ થતા આવનારા સમયમાં સરકારી શાળામાં ભણનાર વિદ્યાર્થીઓને એક પ્રાઇવેટ સ્કૂલ જેવી લાગણી અનુભવાય તેમાં કોઇ નવાઇ નહી.