સુરત શહેરના રાજકરણમાં એક નવા વિવાદે જન્મ લીધો છે. સુરત ભાજપ શાસિત મનપાના શાસક પક્ષના નેતાઓ દ્વારા મોંઘાદાટ મોબાઇલ પોતાના માટે ખરીદવામાં આવતા વિપક્ષ દ્વારા વિરોધ કરવામાંઆવી રહ્યો છે. આશરે છ મહિના પહેલા ખરીદવામાં આવેલા મોબાઇલની માહિતી આરટીઆઈ દ્વારા બહાર આવી છે.
સુરતનું રાજકારણ ફરી ચર્ચામાં
શાસકો માટે પ્રજાના પૈસે ખરીદાયા મોંઘાદાટ ફોન
RTI માં થયો ચોંકાવનારો ખુલાસો
શાસકો પ્રજાના પૈસે કરી રહ્યા છે તાગડધિન્ના
ઉલ્લેખનીય છે કે, હાલ સુરત શહેરના રાજકરણમાં એક ચર્ચાએ જોર પકડ્યું છે કે સુરત શહેરના મનપાના ભાજપના શાસકો પ્રજાના પૈસે તાગડધિન્ના કરી રહ્યા છે. તેનું કારણ છે એક જાગૃત નાગરિક દ્વારા કરાયેલી આરટીઆઈમાં બહાર આવેલી વિગત.
નોંઘનીય છે કે, બિલ જ આ વખતે નવા વિવાદનું કારણ બન્યું છે. કેમકે આ બિલ ચૂકવાયું છે તે જનતાના ટેક્સના પૈસામાંથી. વાત એમ છે કે, સુરત મહાનગર પાલિકાના શાસક પક્ષના મેયર અને ડેપ્યુટીમેયર તેમ જ સ્ટેન્ડિંગ કમિટીના ચેરમેન માટે એપલના આઈફોન ખરીદવામાં આવ્યા છે. જો કે આઈફોન ટેનની ખરીદીની આ વાત જૂની છે. 6 મહિના પહેલા એપલના ફોનની ડિલિવરી લેવામાં આવી હતી.
એક તરફ મનપાની તિજોરી તળિયાજાટક અને શાસકોને જલસા
પરંતુ લોકોને તેનું બિલ હવે હાથ લાગ્યું છે. આ ફોનના બિલમાં દર્શાવેલી ટોટલ રકમ પૂરા એક લાખ ચૌદ હજાર પાંચ સો રૂપિયા છે. જે જનતાની તિજોરીમાંથી ચૂકવવામાં આવ્યા છે. એક તરફ સુરત મનપાની તિજોરી તળિયાઝાટક થઇ ગઇ છે ત્યારે શાસક પક્ષના મેયર, ડે. મેયર, સ્ટેન્ડિંગ કમિટિના ચેરમેન માટે એપલના આઇ ફોન ખરીદવામાં આવતાં. વિપક્ષને પ્રહાર કરવાનો મોકો મળી ગયો છે.
લાજવાને બદલે ગાજી રહ્યા છે નેતાઓ
સુરત મહાનગર પાલિકાના મેયર, ડેપ્યુટી મેયર અને સ્ટેન્ડિંગ કમિટીના ચેરમેન માટે ખરીદાયેલા પ્રત્યેક ફોનની કિંમત અઠયાવીસ હજારથી વધારે છે. એક તરફ સુરત મહાનગર પાલિકાના મેયર સીટી બસમાં મુસાફરી કરીને પોતે સામાન્ય માણસની જેમ રહેતા હોવાની વાતો કરે છે અને બીજી તરફ નાગરિકોની તિજોરીમાંથી મોંધાદાટ ફોન ખરીદીને તિજોરી પર ભારણ વધારી રહ્યા છે. ડિજિટલ ઈન્ડિયાનું સપનું સાકાર કરવા માટે ભલે ફોન ખરીદ્યા પરંતુ ઓછી કિંમતના ફોન ખરીદ્યા હોત તો પણ ચાલી શકે તેમ હતું. એક તરફ શહેરના રોડ રસ્તા બદહાલ છે, નાગરિકોને પાયની સુવિધા મેળવવા તકલીફોનો સામનો કરવો પડી રહ્યો છે ત્યારે જનતાની તિજોરીમાંથી સ્માર્ટ રીતે સ્માર્ટ ફોન વસાવી લઈને લાજવાના બદલે ઉપરથી ગાજી રહ્યા છે કે, જનતાની સેવા માટે આવા ફોન ખૂબજ જરૂરી છે. સુરતમાં કોઈને કોઈ તકલીફ નથી.
શાસકપક્ષ સુખાય અને શાસકપક્ષ હિતાય સાચું ઠરતું હોય તેમ લાગે છે
વાત કંઇપણ હોય પરંતુ ખરેખર રૂ.1 લાખ 14 હજાર 500ના મોબાઇલની શું જરૂર હતી? અને મનપાના શાસકોને એવા કયા ડિજિટલ કામો કરવાનો હોય કે જે ફક્ત આઇફોનથી જ થઇ શકે? બહુજન સુખાય બહુજન હિતાયના સ્લોગન સુરત મનપાનું છે ત્યારે બહુજન સુખાયની જગ્યાએ `શાસકપક્ષ સુખાય અને શાસકપક્ષ હિતાય' જ સામે દેખાઇ રહ્યું છે