જાહેરાત / કોરોના વાયરસને લઇને સુરત મનપા દ્વારા કરાયા આ મહત્વના નિર્ણય, જાણો શું શું કરાયું બંધ

• દેશભરમાં કોરોના વાયરસની અસર
• સરકારી કર્મચારીઓની બાયોમેટ્રિક હાજરી 31 માર્ચ સુધી રદ
• સુરતમાં પણ શિક્ષણ વિભાગ સતર્ક

સુરત મનપાએ તમામ સરકારી કર્મચારીઓની બાયોમેટ્રિક હાજરી 31 માર્ચ સુધી રદ કરી છે. તેમજ પાલિકાના તમામ સ્વિમિંગ પુલ પણ 31 માર્ચ સુધી બંધ રાખવામાં આવશે. આ ઉપરાંત કોમ્યુનિટી હોલમાં બુક કરેલા કાર્યક્રમો પણ રદ કરાયા છે. તેમજ કાર્યક્રમને રદ કરનારને પાલિકા ડિપોઝીટ પરત કરશે.

સુરતમાં પણ શિક્ષણ વિભાગ સતર્ક

દેશભરમાં કોરોના વાયરસની અસર જોવા મળી રહી છે. કોરોનાના કહેર વચ્ચે સ્કૂલ તંત્ર સાથે વાલીઓ પણ અલર્ટ થઇ ગયા છે. સુરતમાં પણ શિક્ષણ વિભાગ સતર્ક થઇ ગયું છે. શિક્ષણ વિભાગે શાળાઓ માટે માર્ગદર્શિકા જાહેર કરી છે. નમસ્તેની મુદ્રામાં અભિવાદન કરવા સૂચના આપવામાં આવી છે. અને કોરોનાનો સંદેશો વિદ્યાર્થીઓ સુધી પહોંચાડવા આદેશ કરાયો છે. આ ઉપરાંત વારંવાર હાથ ધોવા માટે પણ જણાવાયું છે. ગમે ત્યાં ન થૂકવા માટે પણ માર્ગદર્શિકા જાહેર કરાઇ છે.

એરપોર્ટ પર કર્મચારીઓને માસ્ક આપવામાં આવ્યા

તંત્ર દ્વારા એરપોર્ટ પર સ્ક્રિનિંગની વ્યવસ્થા કરવામાં આવી છે. ત્યારે હવે તકેદારીના ભાગરૂપે એરપોર્ટ પર કર્મચારીઓને માસ્ક પણ આપવામાં આવ્યા છે. કોરોના વાયરસની અસર બાદ મુસાફરોની સંખ્યામાં પણ ઘટાડો જોવા મળ્યો છે. સુરતના એરપોર્ટ પર ઈન્ટરનેશનલ મુસાફરોની સંખ્યામાં 30 ટકાનો ઘટાડો નોંધાયો છે. જાન્યુઆરીથી સતત મુસાફરોની સંખ્યામાં ઘટાડો થઈ રહ્યો છે. માર્ચ મહિનામાં અત્યાર સુધી ફક્ત 111 મુસાફરો નોંધાયા છે.

કોરોના વાયરસને લઇ કેન્દ્ર સરકારનો મોટો નિર્ણય

ગૃહ મંત્રાલય દ્વારા આ જાણકારી આપવામાં આવી છે. સરકારે એસડીઆરએફ અંતર્ગત સહાયતા પ્રદાન કરવાના ઉદ્દેશ્યથી કોવિડ-19ને એક અધિસૂચિત કટોકટી તરીકે જાહેર કરી છે. દેશમાં કોરોના વાયરસના કેસની સંખ્યા વધીને શનિવારે 83 પર પહોંચી ગઈ છે. અત્યાર સુધીમાં 10 દર્દી સંપૂર્ણપણે સ્વસ્થ થઈ ગયા છે, જ્યારે 73 લોકો સારવાર હેઠળ છે. જો કે, આ વાયરસની ઝપેટમાં આવતા અત્યાર સુધીમાં બે લોકોના મોત નિપજ્યા છે.