સુરતમાં મેટ્રો ટ્રેન પ્રોજેક્ટને લઈને બેઠકોનો ધમધમાટ જોવા મળી રહ્યો છે. જો કે મેટ્રો ટ્રેનના પ્રોજેક્ટ માટે સુરતમાં સમીક્ષા બેઠક મળી હતી. આ બેઠકમાં પહેલા ફેઝની ડિઝાઈન માટે કન્સલ્ટન્ટની નિમણૂંક કરવામાં આવી છે. આજથી મેટ્રો ટ્રેન પ્રોજેક્ટની સાઇટ વિઝિટની શરૂઆત કરાશે.
શહેરમાં મેટ્રો ટ્રેનના પહેલા તબક્કામાં 40 કિમીના બે રૂટ તૈયાર કરવામાં આવશે. જેમાં પહેલો કોરિડોર સરથાણાથી ડ્રિમસીટી વચ્ચે 21.61 કિમીનો રાખવામાં આવ્યો છે. આ અગાઉ રાજ્ય સરકાર દ્વારા અંદાજે 12,114 કરોડ રૂપિયાના ખર્ચે આકાર લેનારા સુરતના મેટ્રો રેલ પ્રોજેક્ટને મંજૂરીની મહોર મારી દેવામાં આવી હતી.
ત્યાર બાદ કેન્દ્ર સરકારે પણ લીલી ઝંડી આપી હતી. આમ હવે પ્રોજેક્ટ ઝડપથી આગળ વધશે. સુરતમાં મેટ્રો ટ્રેનનો પહેલો કોરિડોર સરથાણાથી ડ્રિમસીટી સુધી 21.61 કિલોમીટરનો એક રૂટ રહેશે, જ્યારે બીજો સારોલીથી ભેસાણ સુધીના બીજા રૂટ પર મેટ્રો ટ્રેન દોડશે.
આમ અમદાવાદ બાદ હવે સુરતમાં પણ મેટ્રો ટ્રેન દોડશે. સુરત શહેર ભારતનું સૌથી તેજ ગતિએ વિકસતું શહેર છે. શહેરના વધતા જતા વિસ્તાર, વસતી અને વાહનોને ધ્યાનમાં રાખીને હવે શહેરમાં થોડા સમય બાદ મેટ્રો ટ્રેન દોડતી જોવા મળશે.