સુરતમાં રાજ્યના આરોગ્ય મંત્રી કુમાર કાનાણીના પુત્ર પ્રકાશ કાનાણી અને મહિલા LRD વચ્ચેની બબાલની ઘટના હાલ ગુજરાતમાં ચર્ચાનો વિષય બની છે. જેમાં પ્રકાશ કાનાણી અને તેના મિત્રોએ કરેલી બબાલનો ઓડિયો વાયરલ થયો હતો. જો કે, હવે ઘટના પર આરોગ્ય મંત્રી કુમાર કાનાણીએ મહત્વનું નિવેદન આપ્યું હતા. કુમાર કાનાણીએ પોતાના જ પક્ષના નેતાઓ પર પ્રહાર કર્યા હતા
કુમાર કાનાણીએ પોતાના જ પક્ષના નેતાઓ પર સાધ્યું નિશાન
કેટલાક તત્વો મને બદનામ કરવાનું કાવતરું કરી રહ્યા છેઃ કાનાણી
આવા તત્વો પાર્ટીને બદનામ કરી રહ્યા છેઃ કાનાણી
રાજયકક્ષાના આરોગ્યપ્રધાન કુમાર કાનાણીનું નિવેદન કર્યુ હતું. કુમાર કાનાણીએ પોતાના જ પક્ષના નેતાઓ પર નિશાન સાધ્યું હતું. તેમણે જણાવ્યુ હતું કે કેટલાક તત્વો મને બદનામ કરવાનું કાવતરું કરી રહ્યાં છે. આવા તત્વો પાર્ટીને બદનામ કરી રહ્યા છે. મને બદનામ કરનારા તત્વો ઉઘાડા પડ્યા છે.
લોકો શોર્ટકટથી જ આગળ વધવા માગે છેઃ કાનાણી
અગાઉ પણ આ મામલે આરોગ્યમંત્રી કુમાર કાનાણીએ પ્રતિક્રિયા આપતા જણાવ્યું હતું કે, મારી વિરુદ્ધ ખોટી રીતે ષડયંત્ર કરાઈ રહ્યું છે. મને ખતમ કરવાના પ્રયાસ થઈ રહ્યા છે. આગામી સુરતની કોર્પોરેશનની ચૂંટણીમાં લોકો શોર્ટકટથી જ આગળ વધવા માગે છે. કુમાર કાનાણીને બદનામ કરો તો જ રસ્તો સાફ થાય તેવું બધા જાણે છે. જેથી મારી વિરુદ્ધ ખોટી રીતે ષડયંત્ર કરાઈ રહ્યું છે.
શું છે સમગ્ર મામલો?
સુરતમાં કુમાર કાનાણીના પુત્ર અને LRD મહિલા વચ્ચે બબાલની ઘટના સામે આવી હતી. પ્રકાશ કાનાણી અને LRD મહિલા સાથે બોલાચાલીનો ઓડિયો અને વીડિયો વાયરલ થયો હતો. સુરતના વરાછામાં કુમાર કાનાણીના દીકરાના મિત્રો રાત્રે ફરવા નિકળ્યા હતા. જેમને રોકવામાં આવતા બબાલ થઇ હતી. LRD મહિલાએ તેના મિત્રોને અટકાવતા પ્રકાશ કાનાણી પણ ઘટના સ્થળે પહોંચ્યા હતા.જોકે પ્રકાશ કાનાણીએ શાંતિ જાળવવા અપીલ કરી હતી. ત્યારબાદ આ મામલો ગરમાતા ઉચ્ચ પોલીસ અધિકારીઓ સુધી વાત પહોંચી હતી. આ અંગે વરાછા પોલીસ સ્ટેશનમાં મંત્રી કુમારના દીકરા પ્રકાશ કાનાણી વિરૂદ્ધ ફરિયાદ પણ નોંધાઇ હતી. જોકે બાદમાં તેમને જામીન પર છૂટકારો મળ્યો હતો. ત્યારે હવે આ મામલે કુમાર કાનાણીએ ફરી એકવખત નિવેદન આપતા રાજકારણમાં ગરમાવો જોવા મળી રહ્યો છે.