સુરતમાં મનપા ચૂંટણી પહેલા ભાજપને મોટો ઝટકો લાગ્યો છે. ભાજપના વોર્ડ નં.15ના ઉમેદવાર મનીષા આહીરના પતિ હવે કોંગ્રેસમાં જોડાઈ જતા ભાજપ માટે કપરી પરિસ્થિતિ ઉભી થઈ છે. ગઈકાલે કોંગ્રેસની સભામાં મહેશ આહીરને કોંગ્રેસના ઘારાસભ્ય પ્રતાપ દૂધાતે ખેસ પહેરાવી પક્ષમાં આવકાર્યા હતા. મહત્વપૂર્ણ છે કે વોર્ડ નં.14-15માં કોંગ્રેસની સભા યોજાઈ હતી.
ભાજપના વોર્ડ નં.15ના ઉમેદવાર મનીષા આહીર વર્ષોથી ભાજપના સનિષ્ઠ કાર્યકર છે. અને સુરતમાં તેમની એક અલગ ઓળખ પણ છે. પરંતુ રાજનીતિ તો રાજનીતિ જ છે. મનિષા આહિરના પતિ મહેશ આહિરે મતદારોમાં મુંજવણ ઉભી કરી દીધી છે. ભાજપના મહિલા ઉમેદવાર મનિષા આહિર પોતાની પાર્ટી અને પોતાના માટે જોરશોરથી ગલી-મહોલ્લામાં પ્રચાર કરી રહ્યા છે. આવા સમયે તેમના પતિએ કોંગ્રેસના દિગ્ગજ નેતા અને ધારાસભ્ય પ્રતાપ દૂધાતના હાથે કોંગ્રેસનો ખેસ ધારણ કરી લીધો છે. ત્યારે સુરતમાં એક તરફ પત્ની ભાજપ માટે તો પતિ કોંગ્રેસની સભાઓમાં જોવા મળશે.
પોતાના પતિના કોંગ્રેસમાં જોડાવવા અંગે મનિષા આહિરે કહ્યું કે, સૌ કોઈનો બંધારણીય અધિકાર છે. અને કોંગ્રેસમાં જોડાવવા અંગે મહેશ આહિરે કહ્યું કે, હું સત્યની સાથે છું. જો કે, રાજનીતિમાં અને ઘરની બહાર કંઈપણ હશે. પરંતુ ઘરમાં તો હમ સબ એક હૈ. હા....રાજનીતિમાં આવું ક્યારેક ક્યારેક જોવા મળતું હોય છે. તમામ લોકોની પોતાની સ્વતંત્રતા છે.