નિવેદન / સુરત ઇંજેકશન કૌભાંડ મામલોઃ ફૂડ એન્ડ ડ્રગ્સ કમિશનરે કહ્યું, તમામ સામે ફોજદારી કેસ થશે દાખલ

• સુરતમાં ટોસિલિઝુમાબ ઈન્જેક્શન કૌભાંડ મામલો
• કોરોનાના દર્દીને અપાતા ઈન્જેક્શનની કાળાબજારીનો પર્દાફાશ
• અમદાવાદ સિવિલના કર્મચારીની સંડોવણી સામે આવી

સુરતમાં ટોસિલિઝુમાબ ઈન્જેક્શન કૌભાંડ સામે આવ્યું છે. કોરોનાના દર્દીને અપાતા ઈન્જેક્શનની કાળાબજારીનો પર્દાફાશ થયો છે. અમદાવાદ સિવિલના કર્મચારી ઘનશ્યામ વ્યાસની સંડોવણી સામે આવી છે. આ મામલે ફૂડ એન્ડ ડ્રગ્સ કમિશનર એચ.જી.કોશિયાએ જણાવ્યું કે દવાની કિંમત 40 હજાર છાપેલી છે. પરંતુ ઉમા કેજરીવાલે 50 હજારમાં દવા ખરીદી અને 57 હજારમાં વેચી હતી.

કોરોનાની મહામારીમાં એક ઈન્જેક્શન પાછળ 17 હજારની કમાણી કરી છે. લાયસન્સ ન હોવા છતાં ઈન્જેક્શન વેચવામાં આવતા હતા. સરકારી સ્ટોકમાંથી કાળાબજારી થયાનું ધ્યાને આવ્યું નથી. નામ વગરના પ્રિસ્ક્રિપ્શનનો ઉપયોગ કરાતો હતો. છુટક ઈન્જેક્શનો ખરીદવામાં આવતા હોવાનો ખુલાસો થયો છે. બેથી વધુ વ્યક્તિઓ મારફતે ઈન્જેક્શન પહોંચાડવામાં આવતા હતા. 3 ઈન્જેકશન જપ્ત કરવામાં આવ્યા છે. તમામ સામે ફોજદારી કેસ દાખલ કરાશે.

અમદાવાદ સિવિલ કર્મચારીની સંડોવણી મામલે સુપરિટેન્ડેન્ટ એમ.એમ.પ્રભાકરનું નિવેદન

ટોસિલિઝુમાબ ઈન્જેક્શન કૌભાંડ સામે આવ્યું છે. જે મામલે સિવિલ સુપરિટેન્ડેન્ટ એમ.એમ.પ્રભાકરે કહ્યું કે કોઇએ આવું કૌભાંડ કરવું જોઇએ નહીં. ઘનશ્યામ  વ્યાસ TB વિભાગમાં નોકરી કરે છે. ઘનશ્યામ વ્યાસ સિવિલ હોસ્પિટલનો કર્મચારી નથી.

આવી રીતે થઈ ઈન્જેક્શનની કાળાબજારી?

• કોરોનાના દર્દીને અપાતા ઈન્જેક્શનની કાળાબજારીનો પર્દાફાશ
• ટોસિલિઝુમાબ ઈન્જેક્શન સામાન્ય રીતે 40 હજાર રૂપિયામાં મળે છે
• ઈન્જેક્શન દિલ્લીથી અમદાવાદ ત્યાર બાદ સુરત પહોંચ્યાનું અનુમાન
• સુરતમાં 40 હજારના ઈન્જેક્શન 57 હજારમાં વેચાતા હતા
• સુરતની સાર્થક ફાર્મા અને ન્યૂ શાંતિ મેડિસીન્સ દ્વારા કાળાબજારી
• અમદાવાદ સિવિલના કર્મચારી ઘનશ્યામ વ્યાસે કે.બી.વી ફાર્માને ઈન્જેક્શન વેચ્યું
• અમદાવાદની કે.બી.વી ફાર્મા પાસેથી ન્યૂ શાંતિ મેડિસીન્સે ઈન્જેક્શન ખરીદ્યા
• સાર્થક ફાર્માએ ન્યૂ શાંતિ મેડિસીન્સ પાસેથી ઈન્જેક્શન ખરીદ્યા
• સાર્થક ફાર્માના માલિક ઉમા કેજરીવાલે 40 હજારનું ઇન્જેક્શન 57 હજારમાં વેચ્યું.