સુરત / ફિલ્મી ઢબે ચીખલીગર ગેંગને ઝડપવા મામલે પોલીસ કમિશનરની પ્રેસ કોન્ફરન્સ, વૉન્ટેડ અંગે આપી માહિતી

• સુરત પોલીસ કમિશનરનું ચિખલીકર ગેંગ મુદ્દે નિવેદન
• ઇકો કારની ચોરી કરતી ગેંગને ક્રાઇમ બ્રાન્ચે પકડી પાડી
• બારડોલી નજીક દસ્તાન નજીકથી 4 શખ્સોની ધરપકડ કરી

સુરત પંથકમાં હાહાકાર મચાવતી ચીખલીગર ગેંગના સભ્યોને દબોચી લેવામાં સુરત ક્રાઇમ બ્રાન્ચને સફળતા સાંપડી છે. ક્રાઈમ બ્રાન્ચે લાઇવ ઓપરેશન કરી બારડોલી નજીકથી ચીખલીગર ગેંગના ચાર શખ્સોને દબોચી લીધા હતા. જેની તપાસમાં આરોપીઓએ 20 થી ગુન્હાને અંજામ આપ્યો હોવાનું ખુલ્યુ છે. વધુમાં પોલીસે આરોપીઓ પાસેથી 10.45 લાખથી વધુનો મુદ્દામાલ કબજે કરી ઊંડી તપાસ હાથ ધરી છે.

પ્રાથમિક તપાસમાં ઝડપાયેલી ગેંગના 20 ગુના ડિટેકટ થયા
સુરત શહેરના દસ્તાન ફાટક રોડ પર નાકાબંધી કરી અને માર્ગમાં જેસીબી આડે મૂકીને મહામહેનતે પોલીસે ગેંગના જરનાઇલસિંહ, લખનસિંહ, જાગીરસિંહ, પ્રદીપસિંહ નામના શખ્સોને ઝડપી લીધા હતા. આ શખ્સો મહારાષ્ટ્રના વતની હોવાનું સામે આવ્યું છે. પોલીસે આરોપીઓની કાર અટકાવી ડંડાવાળી કરી દીધી હતી જેમાં આરોપી અને પોલીસ વચ્ચે ઝપાઝપી પણ થઇ હતી. ત્યારબાદ પોલીસે કારમા સવાર આરોપીઓને પકડી પડ્યા હતા. જે અંગેનો ક્રાઇમ બ્રાંચનો આ વીડિયો પણ સામે આવ્યો છે. આ મામલે સુરત પોલીસ કમિશનરે પત્રકાર પરિષદ યોજી નિવેદન આપ્યું હતું જેમાં જણાવ્યુ કે પ્રાથમિક તપાસમાં ઝડપાયેલી ગેંગના 20 ગુના ડિટેકટ થયા છે અને ઊંડી તપાસમાં અમદાવાદના પણ ઘણા ગુનાઓ ડિટેકટ થશે. જેમાં આરોપી જરનાઇલસિંહ સામે 7થી વધુ ગુનામાં પોલીસ ચોપડે ચડેલો હોવાનું સામે આવ્યું છે એન જરનાઇલસિંહે આચરેલો રાંદેર વિસ્તારનો ગુનો પણ ડિટેકટ થયો છે. 

સુરત પોલીસે રૂ.10.45 લાખથી વધુનો મુદ્દામાલ પકડ્યો
આ ઉપરાંત પોલીસે આ શખ્સો પાસેથી રોકડ રકમ અને દગીનાઓ પણ કબજે કર્યા છે. વધુમાં નવસારીથી ચોરી કરી હતી તે તમામ મુદ્દમાલ પણ કબજે કરી લેવામાં આવ્યો છે. દુકાનોના શટર ઊંચા કરીને ચોરીને અંજામ આપવામાં માહિર ગેંગના શખ્સો પાસેથી સુરત પોલીસે રૂ.10.45 લાખથી વધુનો મુદામાલ જપ્ત કર્યો છે. પોલીસ કમિશનરે વધુમાં જણાવ્યુ કે, ઓપરેશન અંગેનો જે વીડિયો વાયરલ થયો છે તે આખા ઓપરેશનનો એક નાનો ભાગ છે હકીકતમાં પોલીસે જે તે સમયે જે જરૂર હતી તે પગલા ભર્યા છે. આથી ઓપરેશનમાં જોડાયેલા પોલીસ કર્મીઓને ઇનામ પણ આપવામાં આવ્યા છે.