સુરતમાં વીરપુરના જલારામ મંડળના વડાની ઓળખ આપી એક વૃદ્ધ, એક મહિલા સહિત ત્રણ આરોપીએ 80 હજારના ડ્રાયફ્રૂટ ખરીદી વેપારીને નાણા ન ચૂકવી છેતરપિંડી આચરી હતી.
80 હજારના ડ્રાયફ્રૂટ ખરીદી સુરતના વેપારી સાથે છેતરપિંડી કરી
ખટોદરા પોલીસે આરોપીઓની કરી ધરપકડ
વીરપુરના જલારામ મંડળના વડાની ઓળખ આપી છેતરપિંડી
સુરતમાં એક વિચિત્ર ઘટના સામે આવી છે. સુરતમાં 75 વર્ષીય વૃદ્ધએ વીરપુરના જલારામ મંડળના વડાની ઓળખ આપી 80 હજારના ડ્રાયફ્રૂટ ખરીદી ફરાર થઈ ગયેલા એક વૃદ્ધ અને મહિલા તથા ટેક્સી ડ્રાઈવર સામે ફરિયાદ નોંધાવ્યા બાદ ખટોદરા પોલીસે આરોપીઓની ધરપકડ કરી છે. સુરતથી ૮૦ હજાર રૂપિયાના કાજુ બદામ અને અખરોટ લઇને ભાગેલા વૃદ્ધ મહિલા સિદ્ધાર્થ ગોવા જતા રહ્યા હતા. ગોવામાં ત્રણ દિવસ રોકાઇને ફરીથી મુંબઈના થાણેમાં પોતાના નિવાસસ્થાને આવતા પોલીસે તેઓને દબોચી લીધા હોવાનું સામે આવ્યું છે.
કાજુ, બદામ સહિત ૮૦ હજારની કિંમતના ડ્રાયફ્રૂટ ખરીદ્યા હતા
મહારાષ્ટ્રના થાણેથી સુરત આવેલા વૃદ્ધ અને એક આધેડ મહિલાએ પ્રસાદી માટે 80 હજારના ડ્રાયફ્રૂટ ખરીદી સુરતના વેપારી સાથે છેતરપિંડી કરી હતી. સુરતના ખટોદરા વિવેકાનંદ ગાર્ડન સામે જીવકોર સીસાયટી ખાતે ડ્રાયફ્રૂટ બજાર નામે ડ્રાયક્રૂટની દુકાનમાં વયોવૃદ્ધ મહિલા સાથે આવેલા વૃદ્ધે જલારામ મંડળ વીરપુરના વડા હોવાની ઓળખ આપી હતી. પોતાની હેડ ઓફીસ મહારાષ્ટ્ર થાણે સાંઇધામ સોસાયટી થાણે વેસ્ટ ખાતે આવેલ હોવાનું જણાવ્યું હતું. તેમને પ્રસાદ રૂપે વહેંચવા માટે વધારે જથ્થામાં ડ્રાયફ્રૂટની જરૂર હોવાનું કહી 66 કિલો કાજુ કિં.રૂ 49,310 તથા 42 કિલો બદામ કિ.રૂ.28, 673 તથા 1 કિલો અખરોટ કિં.રૂ.1100 મળીને કુલ્લે કિ.રૂ 79083ના ડ્રાયફ્રૂટ ખરીદ્યા હતા.
કારમાં પેમેન્ટ લેવાના બહાને દુકાનની બહાર નીકળી ભાગી ગયા
ત્યારબાદ કોમ્પ્યુટરાઇઝ્ડ બીલ બનાવવાનું હોવાની વિગત પુછતા તેમણે જલારામ મંડલના નામે બીલ બનાવવાનું જણાવ્યું હતું. તેમના મોબાઇલ મારફતે મોબાઇલ નંબર પર ફોન કરાવતા તેમના મોબાઇલ નંબર આવી ગયા હતા. જેથી તેઓના જણાવ્યા મુજબની વિગતવાળું બિલ બનાવી તેમને આપીને પેમેન્ટ કરવા કહેતા તેમણે આ બધો માલ દુકાનની બહાર પાર્ક કરેલ ટેક્ષી પાર્સીંગ કાર (MH-04-JU-7288)માં મુકી દઈ પેમેન્ટ કરવાનું કહ્યું હતું. કારમાં પેમેન્ટ લેવાના બહાને દુકાનની બહાર જઈને વૃદ્ધ અને તેની સાથે 50 વર્ષીય મહિલા કારમાં બેસીને ફરાર થઈ ગયા હતા. સમગ્ર ઘટના સીસીટીવીમાં કેદ થઈ હતી. આ ઘટનાને લઈને વેપારીએ આરોપી ગોકુલદાસ કૃશદાસ અડિયા (વૃદ્ધ) અને સિદ્ધિકા દિપક રાહુ (મહિલા) સહિત વિકાસ વિલાસ કદમ (દ્રાઈવર) સામે ફરિયાદ નોંધાવી હતી.
આરોપી ટોળકીએ 80 થી વધુ ચોરીના ગુન્હાને અંજામ આપ્યાના અહેવાલ
ફરિયાદ બાદ પોલીસ દ્વારા સીસીટીવી ફૂટેજના આધારે તપાસ કરવામાં આવતા ત્રણેય ગોવા ભાગી ગયા હોવાનું માલૂમ પડ્યું હતું. ત્યારબાદ મોબાઈલ નંબરના આધારે પોલીસે કાર્યવાહી શરૂ કરતા 3 દિવસ બાદ આરોપી ગોવાથી ફરી થાણે આવ્યા હોવાનું તપાસમાં ખૂલ્યું હતું. જેને લઈને પોલીસે દોડી જઈ આરોપીઓને ઝડપી લીધા હતા. બીજી તરફ સૂત્રોમાંથી જાણવા મળતી વિગત અનુસાર વૃદ્ધ, તેની સાથેની મહિલા અને તેના અન્ય સાગરીતો અત્યાર સુધીમાં મહારાષ્ટ્રના જુદા જુદા શહેરોમાં લગભગ 80થી વધુ આવી ચોરીના ગુન્હાઓને અંજામ આપ્યા હોવાનું જાણવા મળી રહ્યું છે. હાલ આ ટોળકીએ સુરતમાં કે ગુજરાતમાં કયા કેટલી વખત ચોરીની ઘટનાને અંજામ આપ્યો છે એ દિશામાં પોલીસ દ્વારા તપાસ શરૂ કરાઇ છે.