શ્રીકાર વર્ષા / સુરતમાં મેઘતાંડવના પગલે પુરનું સંકટઃ નદીના પાણી સોસાયટીમાં ફરી વળ્યાં

• સુરતમાં ભારે વરસાદથી કિમ નદીમાં પૂરની સ્થિતિ
• કિમ નદીનું પાણી કઠોદરા ગામ વિસ્તારમાં ફરી વળ્યું
• ભારે વરસાદના પગલે  ઉકાઇ ડેમમાં પાણીની આવકમાં વધારો

સુરતમાં ભારે વરસાદથી કિમ નદીમાં પૂરની સ્થિતિ

સુરતમાં ભારે વરસાદથી કિમ નદીમાં પૂરની સ્થિતિ સર્જાઇ છે. કિમ નદીનું પાણી કઠોદરા ગામ વિસ્તારમાં ફરી વળ્યું છે. નદીના પાણી સોસાયટીઓમાં ફરી વળ્યાં છે. કોસંબાની ત્રણ જેટલી સોસાયટીમાં પાણી ભરાયા છે. સોસાયટીઓમાં પાણી ભરાતા લોકોને ભારે હાલાકીનો સામનો કરવાનો વારો આવ્યો છે.

ભારે વરસાદના પગલે  ઉકાઇ ડેમમાં પાણીની આવકમાં વધારો

સુરત જિલ્લામાં સારા વરસાદના પગલે નદીઓ અને ડેમના જળસ્તરમાં સતત વધારો થઇ રહ્યો છે.  ઉપરવાસમાં વરસાદથી ઉકાઇ ડેમમાં પાણીની આવક વધી છે. જળ સપાટીમાં વધારો થતાં ડેમના દરવાજા ખોલાયા છે. ઉકાઇ ડેમમાં હાલ 85042 ક્યુસેક પાણીની આવક થઇ છે. તો ડેમમાંથી હાલ 70524 ક્યુસેક પાણી છોડવામાં આવ્યું છે.

ઉકાઇ ડેમની હાલની જળ સપાટી 332.61 ફૂટ સુધી પહોંચી છે. ડેમની ભયજનક સપાટી 345 ફૂટ છે.ઉકાઇમાંથી પાણી છોડાતા તાપી નદીનું સ્તર વધ્યું છે. તાપી નદી ઉપર આવેલો કોઝવે પર પાણી ફરી વળ્યા છે.

ભારે વરસાદના પગલે  કીમ નદીની જળ સપાટીમાં વધારો

સુરત જિલ્લામાં પડેલા સારા વરસાદના પગલે સુરતની કીમ નદીની જળ સપાટીમાં વધારો થયો છે. રાત્રી દરમ્યાન કીમ નદીમાં નવા નીરની આવક થતાં  જળ સપાટીમાં વધારો થયો છે. કીમ નદી ભયજનક સપાટીથી પોણો મીટર દુર છે.

કીમ નદીનું હાલનુ લેવલ 12.17 મીટર છે. જ્યારે 13 મીટરે નદીની ભયજનક સપાટી છે. કીન નદીનું જળસ્તર વધતાં નીચાણવાળા વિસ્તારના લોકોને સાવચેત કરાયા છે. ઓલપાડ તાલુકાના કીમ ગામ ખાતે NDRF ટીમ તૈનાત કરાઇ છે.