સુરત શહેર અને જિલ્લામાં અવિરત ધોધમાર વરસાદ વરસ્યો છે. જેમાં શહેરમાં 2 કલાકમાં ભારે વરસાદ ખાબક્યો છે. જેમાં સૌથી વધુ સેન્ટ્રલ ઝોનમાં 44 મીમી વરસાદ પડ્યો છે. જ્યારે રાંદેર, જહાંગીરપુરા, અડાજણ, પાલ, અઠવાઇલાઇન્સ, ઉધના, રીંગ રોડ, વરાછામાં વરસાદ પડ્યો છે. આ સાથે જિલ્લામાં પણ ધોધમાર વરસાદ પડતાં નદીઓ ગાંડીતૂર બની છે, જ્યારે ભારે વરસાદના પગલે ઘરોમાં પાણી ભરાયાં છે.
ઓલપાડના બાવા ફળિયામાં ભરાયા પાણી
સુરત શહેર અને જિલ્લામાં ધોધમાર વરસાદ પડ્યો છે. જેમાં ઓલપાડના બાવા ફળિયામાં પાણી ભરાયાં છે. 70થી વધુ મકાનો ઓલપાડ ગામથી વિખૂટા પડ્યાં છે. સેના ખાડી ઓવરફલો થતા પાણી ફરી વળ્યાં છે. ઓલપાડ ગામથી બાવા ફળિયા જવાનો રસ્તો બંધ થઇ ગયો છે.
માંગરોળના વાંકલ ગામની ભૂખી નદીમાં પૂર
સુરત જિલ્લામાં ધોધમાર વરસાદના પગલે માંગરોળના વાંકલ ગામની ભૂખી નદીમાં પૂર આવ્યું છે. નદીમાં પાણીની આવક વધતા ભૂખી નદી ગાંડીતૂર બની છે. નદીમાં પાણીની આવક થતા પુલ પર પણ પાણી ફરી વળ્યાં છે.
સુરતમાં ભારે વરસાદના કારણે ખાડી ઓવરફ્લો
સુરત શહેરમાં અવિરત વરસાદ વરસી રહ્યો છે. અવિરત વરસાદથી રસ્તાઓ પાણી પાણી થઇ ગયા છે. ભારે વરસાદના કારણે ખાડીઓ ઓવરફ્લો થઇ છે. ખાડી ઓવરફ્લો થતા લોકોના ઘરમાં પાણી ઘૂસી ગયા છે. લોકોના ઘરમાં પાણી ભરાતા ભારે હાલાકી પડી રહી છે.
ઉમરપાડા તાલુકામાં ધોધમાર વરસાદ
ઉમરપાડા તાલુકામાં પણ ધોધમાર વરસાદ વરસ્યો છે. ભારે વરસાદને પગલે નદી-ચેકડેમો છલકાઇ ગયા છે. ઉમરપાડાની વીરા નદીમાં પણ પાણીની ભારે આવક થઇ છે. ભારે વરસાદથી ઉમરપાડાની નદીઓ ગાંડીતૂર બની છે. પાણીની આવકથી લો લેવલ બ્રિજ પાણીમાં ગરકાવ થઇ ગયા છે. જેના કારણે લોકોને ભારે હાલાકીનો સામનો કરવાનો વારો આવ્યો છે.
કામરેજ વિસ્તાર થયો પાણીમાં ગરકાવ
સુરત જિલ્લામાં સાર્વત્રિક વરસાદ વરસી રહ્યો છે. અવિરત વરસાદના કારણે કામરેજ વિસ્તાર સૌથી વધુ પ્રભાવિત થયો છે. આ વિસ્તારની હાઇવે પર આવેલી સોસાયટીમાં પાણી ભરાઇ ગયા છે. ધોધમાર વરસાદના પગલે નવીમાં સતત પાણીની આવકમાં વધારો થતાં સુરત જિલ્લાની તમામ નદીઓમાં ઘોડાપુર આવ્યું છે.
બારડોલીમાં રાતથી ધોધમાર વરસાદ
સુરત જિલ્લામાં ભારે વરસાદના કારણે પાણી ભરાઇ જવાની સ્થિતિ સર્જાઇ છે. બારડોલીમાં ધોધમાર વરસાદના કારણે રેલવે અંડરપાસમાં પાણી ભરાઇ ગયા છે. બારડોલીમાં સુગર મિલ પાસે આવેલા ગરનાળામાં પાણી ભરાઇ ગયા છે. પાણી ભરાતા રેલવે અંડરપાસ બંધ કરાયો છે.