સુરત: ગેંગસ્ટર રવિ પૂજારીની આફ્રિકાના સેનેગલમાંથી ધરપકડ થઈ છે. રવિ પૂજારીને પોલીસ સુરતમાં લઈને આવશે. મહત્વનુ છે કે ગેંગસ્ટર રવિ પૂજારી સામે સુરત અને નવસારીમાં 5 ગુના નોંધાયા છે. રવિ પૂજારીએ સુરતના વેપારી પાસેથી કરોડોની ખંડણી માગી હતી.
કાપડના વેપારીને ફોન અને મેસેજ કરીને રવિ પૂજારીએ ખંડણી માંગી હતી. આ મામલે સુરતમાં ફરિયાદ થઈ છે. જ્યારે નવસારીના નગરપાલિકીના પૂર્વ પ્રમુખ પાસેથી પણ રવિ પૂજારીએ 5 કરોડની ખંડણી માંગી હતી. ગુજરાતના અનેક પોલીસ સ્ટેશનમાં રવિ પૂજારી સામે ફરિયાદ થઈ છે. ગુજરાતમાં અનેક કેસમાં રવિ પૂજારી વોન્ટેડ છે.
રવિ પૂજારીની ધરપકડ સાથે જોડાયું છે ગુજરાત કનેક્શન
રવિ પૂજારીએ ગત વર્ષે વડગામના ધારાસભ્ય જિજ્ઞેશ મેવાણીની હત્યા કરવા માટે ધમકી આપી હતી ત્યારે અમૂલ કંપનીના એમડી આર. એસ. સોઢી પાસે રપ કરોડની ખંડણી માગી હતી. જેની તપાસ ક્રાઇમ બ્રાંચ કરે છે.
રાજ્યના પૂર્વ મંત્રી જયંતીભાઈ કવાડિયા પાસે બે દિવસ ફોન ઉપર રવિ પૂજારી ગેંગના શખ્સોએ પાંચ લાખ આપી દેવા માટે ખંડણી માગી હતી તો પાલડી વિસ્તારમાં આવેલી ઉમા સોસાયટીમાં રહેતા બિલ્ડર પરેશ પટેલ પાસેથી પણ પાંચ કરોડની ખંડણી માગી હતી.
ડોન રવિ પૂજારીએ અવારનવાર ગુજરાત અને મુંબઇના ઉદ્યોગપતિ તેમજ ફિલ્મી ઇન્ડ્રસ્ટી સાથે સંકળાયેલા લોકો પાસેથી કરોડો રૂપિયાની ખંડણી માગી હતી. આવનારા દિવસોમાં રવિ પૂજારીને દેશમાં લાવવામાં આવશે તો ગુજરાત પોલીસ તેની ધરપકડ કરીને પૂછપરછ કરશે. રવિ પૂજારી સેનેગલના ડકાર વિસ્તારમાંથી ઝડપાયો છે. રવિ પૂજારી પર બોલિવૂડના પ્રખ્યાત લોકો પાસેથી પૈસા વસૂલ્યા હોવાનો પણ આરોપ છે. તેની ધરપકડનો શ્રેય ગુજરાત એટીએસને જાય છે.
ઉલ્લેખનીય છે કે ગુજરાત એટીએસના એસપી હિમાંશુ શુક્લાએ સેન્ટ્રલ એજન્સીઓને રવિ પૂજારી આફ્રિકા છૂપાયો હોવાની ટિપ આપી હતી જેના કારણે આ સફળતા મળી છે. એટીએસના એસપી હિમાંશુ શુક્લાએ જણાવ્યું છે કે રવિ પૂજારીની માહિતી મળતાં સેન્ટ્રલ એજન્સીઓને જાણ કરવામાં આવી હતી. હાલ ગુજરાતમાં રવિ પૂજારી વિરુદ્ધમાં ૧૧ ગુના દાખલ થયા છે.