સુરતમાં ગણેશોત્સવમાં ધર્મની આડમાં ધતિંગ થઇ રહ્યા છે. ગણેશોત્સવ દરમિયાન દારૂની રેલમછેલ થઇ હોવાનો એક વીડિયો સામે આવ્યો છે. જેમાં કેટલાક શખ્સો દારૂ પીને ધતિંગ કરતા જોવા મળે છે.
સોશિયલ મીડિયામાં વાયરલ થયેલા વીડિયોમાં જાહેરમાં બિયર અને દારૂ પીતા શખ્સો જોવા મળી રહ્યાં છે. જેમાં શખ્સો નશામાં બિંદાસ્ત નાચી રહ્યાં છે. આ વીડિયો સુરતના ગોલવાડનો હોવાનું માનવામાં આવી રહ્યું છે.
આ વીડિયોને લઇ ફરી એક વાર સુરત પોલીસ પર સવાલ ઉઠી રહ્યાં છે. કે શું આ લોકોને પોલીસનો કોઇ ડર જ નથી? જો રાજ્યમાં દારૂ બંધી છે તો પછી દારૂ અને બિયરોની બોટલો આવી ક્યાંથી? શું દારૂબંધી માત્ર કાગળ પર જ છે? આવા અનેક સવાલ સુરત પોલીસ પર ઉભા થઇ રહ્યા છે.
આ અગાઉ પણ સુરતમાં ખુલ્લેઆમ દારૂ વેચાતો હોવાનો વીડિયો સામે આવ્યો હતો. તો શું પોલીસ આવા વીડિયો વાયરલ થયા બાદ કોઇ કાર્યવાહી કરે છે કે નહીં અને ઉત્સવના નામે દારૂ પીને ધતિંગ કરતા આવા લોકો પર કાર્યવાહી કરે છે કે નહીં તે જોવું રહ્યું.
ગોલવાડ વિસ્તાર દારૂ માટે કુખ્યાત
એક નહીં પણ ત્રણ વીડિયો સોશિયલ મીડિયામાં વાયરલ થયા છે. આ વીડિયો સુરતના ગોલવાડ વિસ્તારનો હોવાનું માનવામાં આવી રહ્યું છે. ગોલવાડ વિસ્તારનું એટલે મનાઇ રહ્યું છે કે, આ વિસ્તાર દારૂ માટે કુખ્યાત છે. જાહેરમાં દારૂ વેચાતો હોવાના અહેવાલો અગાઉ પણ આવી ચુક્યા છે. પોલીસ જ્યારે આ વિસ્તારમાં રેડ કરવા જતી ત્યારે મહિલાઓ દ્વારા પણ હુમલા થયા હતા.
તો આ અંગે પોલીસ કમિશનર હરિકૃષ્ણ પટેલે જણાવ્યું કે, અમે કાર્યવાહી કરી કહ્યાં છીએ. વીડિયો ગોલવાડનો છે કે નહીં તો ખાત્રી કરી અમે કાર્યવાહી કરશું. જ્યારે આ અંગે SMCના વિરક્ષ નેતા પપન તોગડિયાએ જણાવ્યું કે, ભારતીય જનતા પાર્ટીનું શાસન ખાલી વાહિયાત વાતો કરી રહ્યું છે. ગાંધીના ગુજરાતમાં દારૂ બંધી હોવા છતાં દારૂ મળી રહ્યો છે. ગુજરાતમાં દારૂ મળતો જ ન હોય તો યુવાનોને દારૂ મળ્યો જ ક્યાંથી? જો ગુજરાતમાં દારૂ મળે જ નહીં તો આ યુવનો ક્યારેય દારૂ પીવાનું નથી.