સુરત / તંત્રની કામગીરીને ઘોળીને પી જતા ગેમ સંચાલકો, સીલ કર્યા છતાં ગેમ ઝોનમાં લોકોની અવર-જવર

રાજકોટમાં શનિવારનો દિવસ મોતની ચિચિયારીઓથી ગુંજી ઉઠ્યો હતો. TRP ગેમઝોનમાં લોકો બાળકો સાથે ફરવા ગયાં હતાં ગેમ રમવા ગયાં હતા. પરંતુ તેમની જ જિંદગી સાથે ગેમ રમાઈ ગઈ હતી. રાજકોટમાં ટીઆરપી ગેમઝોનમાં ગત રોજ લાગેલ આગમાં 33 માસૂમ લોકોએ પોતાનો જીવ ગુમાવવાનો વારો આવ્યો છે.

રાજકોટની આગ દુર્ઘટના બાદ અલગ-અલગ ઠેકાણે ગેમ ઝોન પર અધિકારીઓની ટીમ ત્રાટકી હતી અને ફાયર સેફ્ટી સહિતના નિયમોનું પાલન થયું છે કે કેમ તેને લઇને તપાસ કરી હતી. પરંતુ સુરતના ગેમ સંચાલકો જાણે તંત્રની કામગીરીને ઘોળીને પી ગયા હોય એવું લાગી રહ્યું છે.

શું તપાસની દેખાડા પૂરતી કાર્યવાહી કરી?

સુરત મહાનગરપાલિકાની ટીમની ગેમઝોનમાં તપાસની દેખાડા પૂરતી કાર્યવાહી કરી હતી. ગઇકાલે તપાસ બાદ સુરતના 11માંથી 10 ગેમઝોનને સીલ કરાયા હતા પરંતુ સીલ કર્યા છતા શોર્ટ ગેમઝોનમાં લોકોની અવરજવર થઈ રહી છે.

તંત્રએ માત્ર કાર્યવાહી કર્યાનો દેખાડો કર્યો છે કે શું..?

ગઇકાલે તપાસ ટીમ દ્વારા સુરતના પીપલોદના શોર્ટ ગેમઝોનને સીલ કરાયું હતું અને આજે સીલ માર્યા છતા ગેમઝોનના કર્મચારીઓ અંદર પ્રવેશ કરી રહ્યા છે. હવે કોઈ જગ્યા જ્યારે તંત્ર દ્વારા સીલ હોવા છતાં કોઈ વ્યક્તિ અંદર પ્રવેશ કરે તે ખૂબ જ ગંભીર બાબત ગણાય છે. આ જોઈને એવું લાગી રહ્યું છે કે તંત્રએ માત્ર મુખ્ય દરવાજો સીલ કરી કાર્યવાહી કર્યાનો દેખાડો કર્યો છે કે શું..?

વધુ વાંચો: TRP ગેમઝોન અગ્નિકાંડ મામલે સરકાર એક્શન મોડમાં, 6 અધિકારીઓને કરાયા સસ્પેન્ડ

અહીં સવાલ એ થાય કે

• રાજકોટની ઘટનામાંથી પણ સુરત મહાનગરપાલિકાએ બોધ કેમ ન લીધો?
• સુરત મહાનગરપાલિકાને નાગરિકોના જીવની કોઈ ચિંતા નથી?
• સુરત મહાનગરપાલિકાને કાર્યવાહીના નામે દેખાડો કરવાની કેમ પડી જરૂર?
• ગેમઝોન સંચાલકો પર કેમ મહેરબાન છે સુરતનું તંત્ર?
• કઈ મજબૂરીના લીધે ગેમઝોન સંચાલકો પર નથી થઈ કડક કાર્યવાહી?