નવતર પ્રયોગ / શાળામાં પ્રથમ પગલું મુકતા ભૂલકાંઓના પગની છાપ લેવાઈ : જુઓ સુરતમાં કેવો નવતર પ્રયોગ કરાયો

• સુરત નગર પ્રાથમિક શિક્ષણ સમિતિનો નવતર પ્રયોગ
• ધોરણ 1માં પ્રવેશ લેનારા ભૂલકાઓના પગની છાપ લેવાઇ 
• શાળામાં પ્રથમ પગલું મુકતા કંકુ પગલાંના ફોટા પાડવામાં આવ્યા

ગુજરાતના 18000 ગામોની 32,013 સરકારી શાળાઓમાં પ્રવેશોત્સવ 2.0નું આયોજન કરવામાં આવ્યું છે. જેના ભાગરૂપે સુરતની શાળામાં પણ પ્રવેશોત્સવ અને કન્યા કેળવણી અંતર્ગત કાર્યક્રમ યોજાયો હતો. આ તકે સુરત નગર પ્રાથમિક શિક્ષણ સમિતિ દ્વારા બાળકોને શાળાનો આ પ્રથમ દિવસ જીંદગીભર યાદ રહે તેવા ઉમદા ભાવથી નવતર પ્રયોગ કરવામાં આવ્યો હતો. જેમાં ધોરણ 1માં પ્રવેશ લેનારા ભૂલકાઓના કંકુ પગલાં કરાવવામાં આવ્યા હતા. જેની યાદગીરીના ભાગસ્વરૂપે ફોટો ફ્રેમ બનાવવામાં આવશે.

ફોટાની ફ્રેમ કરાવી શિક્ષણ સમિતિ વાલીઓને આપશે ભેટ
સુરત નગર પ્રાથમિક શિક્ષણ સમિતિ હસ્તકની શાળામાં શાળા પ્રવેશોત્સવ યોજાયો હતો. આ અવસર બાળકોને કાયમી માટે યાદ રહે તે માટે શિક્ષણ સમિતિના સભ્યોએ વિચાર્યું હતું અને એક નવતર પ્રયોગ અમલમાં મૂક્યો હતો. આ કાર્યક્રમ દરમિયાન જેટલા પણ ભૂલકાઓએ પ્રવેશ મેળવ્યો હતો. તે તમામ બાળકોના કંકુ પગલા કરાવી અને એક કાગળ પર પગલાંની છાપ લેવામાં આવી હતી. આ ઉપરાંત કંકુ પગલાં વેળાના ફોટા પણ પાડવામાં આવ્યા હતા. જેમાં બાળકોના પગની છાપ લઈ કાયમી સંભારણારૂપે શિક્ષણ સમિતિ દ્વારા ફ્રેમમાં મઢાવવામાં આવશે. ત્યારબાદ યાદગીરીના ભાગસ્વરૂપે બનાવેલી ફોટો ફ્રેમ જે તે બાળકોના વાલીઓને સુપ્રદ કરવામાં આવશે. નોંધનિય છે કે, શિક્ષણ સમિતિના આ નવા અભિગમને વાલીઓએં પણ અવકાર્યો હતો.

સીએમના હસ્તે  મેમદપુર પ્રાથમિક શાળાએથી રાજ્યકક્ષાના પ્રવેશોત્સવનો શુભારંભ
રાજ્યભરની શાળાઓ શરૂ થઇ ગઇ છે. નવા શૈક્ષણિક સત્રનો પ્રારંભ થઇ ગયો છે. ત્યારે રાજ્યની શાળાઓમાં 23 થી 25 જૂન સુધી પ્રવેશોત્સવ ચાલશે. મુખ્યમંત્રી ભૂપેન્દ્ર પટેલના હસ્તે 17મા શાળા પ્રવેશોત્સવની શરૂઆત કરવામાં આવી હતી. મુખ્યમંત્રીએ બનાસકાંઠાની  મેમદપુર પ્રાથમિક શાળામાં પ્રવેશોત્સવ શરૂ કરાવ્યો હતો. આ 3 દિવસ દરમિયાન 18 હજાર ગામોની સરકારી શાળાઓમાં બાળકોને પ્રવેશ કરાવાશે. જેમાં 32 હજાર બાળકોને  13 સરકારી શાળાઓમાં પ્રવેશ કરાવવામાં આવશે.