સિદ્ધિ / બેટી બચાવો બેટી પઢાવોનું સુત્ર સાર્થક, બની નેવીમાં પસંદ પામનાર સુરતની પ્રથમ મહિલા

લક્ષ્ય નક્કી હોય અને એ દિશામાં મક્કમ ગતિએ ડગલા મંડાતા હોય તો પછી લક્ષ્યસિદ્ધિ માટે વધારે રાહ નથી જોવી પડતી. જો કે એ વાત જુદી છે કે તે માટે સંનિષ્ઠ પ્રયાસ અને શિસ્તબદ્ધ જીવન કવાયત પહેલી શરત  હોય છે. આ વાતની યથાર્થતા ખૂબ જ નાની ઉંમરે જે નામ સાથે જોડાઈ છે તે હોનહાર દીકરીનું નામ છે આયુષી દેસાઈ. સુરતની આ દીકરીએ ભારતની પ્રતિષ્ઠિત સર્વિસ એવી નેવીમાં સ્થાન મેળવીને માત્ર વતનું જ નહીં પરંતુ સમગ્ર દેશનું ધ્યાન ખેંચ્યું છે. આવો જોઈએ એક પુરુષાર્થી પુત્રીની શ્રેષ્ઠ સિદ્ધિનો આ અહેવાલ.

આ મેડલ્સના ઢગલાંથી લદોલદ મેજ. આ ટ્રોફિઓની ભરમારથી શોભતી ઘરની દીવાલો અને આ પુરષાર્થને સન્માનિત કરતા આ પ્રમાણપત્રો. આ કંઈ ટૂંકાગાળાની મહેનતથી રાતોરાત મળી જતા સન્માન નથી. આ બધું પામવા કેટલો પુરષાર્થ કરવો પડે છે અને જીવનને કેટલું શિસ્તમય બનાવવું પડે છે. સુરત ખાતે રહેતી આયુષી હાલમાં જ ભોપાલ ખાતે નેવીમાં ઓફિસરનાં પદ માટેની પરીક્ષા સફળતા પૂર્વક ઊત્તીર્ણ કરી આવી છે.

આયુષી દેસાઈ ભારતીય નેવીમાં નેવલ આર્કિટેક્ચરમાં આસિસ્ટન્ટ લેફટન્ટ તરીકે નિમણૂંક પામી છે અને હવે તે ટૂંક સમયમાંજ ઔપચારિક વિધિ સંપન્ન કરીને નેવીમાં પોતાનું  સ્થાન સંભાળી લેનાર છે. મધ્યપ્રદેશના ભોપાલ ખાતે લેવામાં આવેલી નેવીની પરીક્ષાામાં સમગ્ર ભારતમાંથી 800 જેટલા ઉમેદવારો આવ્યા હતા. આ ઉમેદવારો પૈકી 5 ઉમેદવારો ફાઇનલ કરવામાં આવ્યાં. જેમાંથી એક હતી આયુષી દેસાઈ. નેવી જોઈન કર્યા બાદ આયુષીને વિક્રાંત જહાજ જેવું જ કોઈ સ્વદેશી જહાજ ડિઝાઈન કરવાની ઈચ્છા છે.

આયુષી દેસાઈ નાનપણથી જ શિસ્તપાલનની આગ્રહી રહી છે. તેને તેના માતા પિતા દ્વારા પણ તેને સપોર્ટ કરવામાં આવી રહ્યો છે. નાનપણથી નીતિનિયમોને ચુસ્ત રીતે વળગી રહનારી આયુષી ક્યારેય પણ  હેલમેટ વગર બાઈક ચલાવતી નથી. શિસ્ત પાલન માત્ર હેલ્મેટ પૂરતું નહીં પરંતુ પોતાની રમતગમતની પ્રવૃત્તિ હોય કે, સામાજિક અને વ્યવહારિક  કામકાજ હોય તે હંમેશા નિયમોનું પાલન કરતી આવી છે અને આ સિદ્ધિ પણ તેનું જ તો પરિણામ છે. તેના માતા આજે પોતાની પુત્રીની આ આકાશ આંબતી સિદ્ધિ પર ગૌરવ અનુભવી રહ્યાં છે. 

સુરતના જિજ્ઞાબેન દેસાઈ અને અને દેવાંગભાઈ દેસાઈના સંતાનમાં એક માત્ર પુત્રી એવી આયુષીએ આજે આ સિદ્ધિ મેળવીને અનેક માતા પિતાની પુત્ર ખેવનાને ફરીવાર વિચારતી કરી દીધી છે. દીકરાનેય ટપી જાય તેવી દીકરી હોય તો પછી કયા મા- બાપ પુત્ર ઝંખના રાખ્યા કરે? અને એટલેજ તો પોતાની હોનહારપુત્રી આયુષીની સિદ્ધિને વાગોળતા તેના પિતાની આંખમાં હર્ષના આંસુ સમાતા ન હતા.

એક પિતા માટે દીકરી સદા વ્હાલનો દરિયો હોય છે અને તેમાં પણ જ્યારે દીકરી જ્યારે મા-બાપને  જ નહીં પરંતુ સમગ્ર રાષ્ટ્રનું માથું ગૌરવથી ઊંચુ રખાવે ત્યારે એક પિતાની છાતી ગજગજ ફૂલ્યા વગર રહેતી નથી. હવે નેવીમાં સિલેક્શન બાદ આયુષી બે દિવસમાં કેરલા ખાતે ટ્રેનિંગમાં જશે. ત્યાર બાદ તેણીને પોસ્ટિંગ મળશે. પિતા દવાંગભાઈ દીકરીની સિદ્ધિથી ખૂબ ખુશ છે પરંતુ દીકરીથી છૂટા પડવાની વ્યથા પણ છૂપાવી શકતા નથી. આયુષીને મળેલી સિદ્ધિથી સુરત સહિત જ્યારે ગુજરાતને ગૌરવ મળ્યું છે. કેમ કે, ગુજરાતમાંથી એક માત્ર આયુષી છે જે જે નેવી માટે સિલેક્ટ થઇ છે. ત્યારે રાજ્ય સરકારનો બેટી બચાવો અને બેટી પઢાવોનો નારો સાર્થક થતો જણાઈ રહ્યો છે.