સુરતમાં 10 નવેમ્બરે MD ડ્રગ્સ સાથે રાજસ્થાની યુવક ઝડપાવાના મામલે મોટી કાર્યવાહી, ડ્રગ્સ પેડલર જૈમીન સવાણીના ગોરખધંધાનો પર્દાફાશ
ડ્રગ્સ સાથે ઝડપાયો રાજસ્થાની યુવક
ડ્રગ્સ મગાવનાર જૈમીન સવાણીની પણ ધરપકડ
જૈમીન પાસેથી મળ્યા કેમિકલ-સાધનો
સુરતમાંથી રાજસ્થાની ડ્રગ્સ પેડલર ઝડપાયા બાદ શહેર પોલીસની રડારમાં આવેલા સરથાણા વિસ્તારમાં રહેતા જૈમીન સવાણીની તપાસમાં તેણે પોતે આ ડ્રગ્સની લેબોરેટરી શરુ કરવા તૈયારી કરી ચૂક્યો હોવાનો ખુલાસો કર્યો છે. એસઓજી પોલીસે સુરતના સરથાણાના એક શોપિંગ કોમ્પલેક્ષમાં દુકાન ભાડે લઈ ચાલતી લેબોરેટરીમાં દરોડો પાડી 22 લાખ કિઁમતનો મુદ્દામાલ કબજે કર્યો છે.
કઈ રીતે ડ્રગ્સ વ્યસની જૈમીન સવાણી ઝડપાયો
આ પહેલા રાજસ્થાનથી એમડી ડ્રગ્સ લઈને આવતાં એક પેડલરને એસઓજી પોલીસે ઝડપી પાડ્યો હતો. જેની પૂછપરછ કરતા આ ડ્રગ્સ સુરતના જૈમીન સવાણીએ મંગાવ્યું હોવાનું ખુલ્યું હતું. પોલીસે જૈમીનની પણ સઘન પૂછપરછ કરતાં તે લોકડાઉન દરમિયાન ડ્રગ્સના રવાડે ચઢયો હોવાનું કબૂલ્યું હતું. ડ્રગ્સનો નશો સંતોષવા તે જે ડ્રગ્સ મંગાવતો તે પૈકી થોડું ડ્રગ્સ વેચી નાંખતો હોવાનું કબુલતા પોલીસ પણ ચોંકી ઉઠી હતી. પોલીસ દ્વારા તેની પૂછપરછ કરતા આ ડ્રગ્સ કોની કોની પાસે ક્યાંથી ડ્રગ્સ મંગાવતો તેમજ તેનો ઉપયોગ કરવામાં તેની સાથે બીજા કોણ સામેલ હતા એની માહિતી મેળવવા તપાસ શરૂ કરાઈ હતી.આ તપાસમાં જૈમીનના ખતરનાક ઇરાદા અને તે માટે તેના દ્વારા કરાયેલી તૈયારીનો પણ પર્દાફાશ થયો હતો.
યુટ્યુબ અને સંપર્કોથી લેબોરેટરી ઉભી કરી
સુરત શહેર પોલીસ કમિશનર અજય તોમરના જણાવ્યા પ્રમાણે ઉપયોગમાં લેવા મંગાવાયેલા ડ્રગ્સ પૈકી અમુક ભાગ વેંચતા તેને તેના સારા રૂપિયા મળ્યા હતા. જેથી તેણે જાતે જ ડ્રગ્સ બનાવી વેચવાનો પ્લાન બનાવ્યો હતો. આ માટે તેણે ઈન્ટરનેટ પર યુ ટ્યૂબ તથા અન્ય માધ્યમોથી ડ્રગ્સ ઘરે જ બનાવવાની માહિતી એકઠી કરી હતી. અને તે પછી ડ્રગ્સ બનાવવા માટે રો મટિરિયલ્સ ભેગું કરવા માંડ્યું હતું. ડ્રગ્સ ની ફેક્ટરી ઉભી કરવા માટે સરથાણા રોડ ઉપરના રાજવી શોપિંગ કોમ્પલેક્ષમાં એક દુકાન ભાડે લીધી હતી. આ જગ્યા પર ડ્રગ્સ બનાવવાની શરૂઆત કરે એ પહેલા તેનો પેડલર સુરત પોલીસના હાથે ચઢી ગયો હતો. શહેર પોલીસ જૈમીન સુધી પહોંચી જતા તે ડ્રગ્સની ફેક્ટરી ચાલુ કરી શક્યો ન હતો.
મહેંદી કલાસના બોર્ડથી આડમાં ડ્રગ્સ બનાવવાનીં ફેક્ટરી
એસઓજીની ટીમે જૈમીન દ્વારા ભાડે લેવામાં આવેલી દુકાનમાં દરોડો પાડવામાં આવ્યો હતો અને રો મટીરીયલ્સ કબજે કરવામાં આવ્યું હતું. તેણે ભાડે રાખી એ દુકાનમાં પહેલા મહેંદી કલાસ ચાલતાં હતાં. ડ્રગ્સ મામલે કોઈને શંકા ના જાય એ માટે તેણે મહેંદી કલાસના બોર્ડ હટાવ્યા ના હતાં. અને અંદર ડ્રગ્સ બનાવવાનીં ફેક્ટરી શરૂ કરી હતી.
જૈમિન કેવી રીતે ડ્રગ્સ બનાવનારો બન્યો?
જૈમિન ડ્રગ્સનું સેવન કરતો હતો
જૈમીન રાજસ્થાન રૂટથી ડ્રગ્સ મંગાવતો હતો
જૈમીને પોતે ડ્રગ્સ બનાવવાનું શરૂ કર્યુ હતુ
જૈમીને યુટ્યુબ અને સંપર્કોથી લેબોરેટરી ઉભી કરી હતી
લેબમાંથી કેમિકલ અને સાધનો મળી આવ્યા છે
ઇન્ડિયા માર્ટથી ઓનલાઇન પાઉડર મંગાવ્યા છે
જૈમિન સિન્થેટિક ડ્રગ્સ બનાવવાનો પ્રયાસ કરી રહ્યો હતો