સુરતમાં RTO દ્વારા કાર્યવાહી કરવામાં આવી છે. ડ્રાઈવિંગ ટેસ્ટ વગર લાયસન્સ મેળવનારાઓ પર RTO દ્વારા કાર્યવાહી કરાઈ છે. ડ્રાઈવિંગ ટેસ્ટ વગર આપવામાં આવતાં લાયસન્સ માટે RTO દ્વારા તપાસ કરવામાં આવી હતી. આ દરમ્યાન 55 જેટલાં લોકોને આઈડેન્ટીફાઈ કરાયાં હતાં. ત્યારે હવે RTO દ્વારા બોગસ લાયસન્સ ધારકોને બોલાવીને તપાસ કરાશે.
મળતી માહિતી મુજબ RTOમાં એજન્ટો પૈસા લઈને લોકોને લાયસન્સ બનાવી આપતાં હતાં. એજન્ટો 6થી 10 હજાર રૂપિયા લઈને લાયસન્સ બનાવી આપતા હતાં. આ મામલે જાણ થતાં જ RTO દ્વારા આ સમગ્ર મામલે તપાસ કરીને કાર્યવાહી કરવામાં આવી છે.
ટુવ્હીલર અને ફોર વ્હીલર લાયસન્સનાં 10 હજારઃ
અહીંયા એજન્ટ ડ્રાઇવિંગ ટેસ્ટ વિના જ ટુ વ્હીલર લાયસન્સ બનાવવાનાં 4 હજાર અને ફોર વ્હીલર લાયસન્સ બનાવવાનાં 6 હજાર રૂપિયા વસૂલી રહ્યાં હોવાંની ફરિયાદ પણ ઇન્ચાર્જ RTOને મળી છે. આ સાથે એ પણ જણાવ્યું હતું કે ટુ એન્ડ ફોર વ્હીલરનાં ડ્રાઇવિંગ ટેસ્ટ વિના જ લાયસન્સ બનાવવા માટે એજન્ટો 10 હજાર રૂપિયા વસૂલી રહ્યાં છે.
ડ્રાઇવિંગ ટેસ્ટનાં સોફ્ટવેર સાથે પણ ચેડાં થઇ રહ્યાં હોવાનું અનુમાન લગાવવામાં આવી રહેલ છે. મહત્વનું છે કે RTOએ ડ્રાઇવિંગ ટેસ્ટનાં સોફ્ટવેર જ બદલ્યાં ન હતાં. દરમ્યાન આ સોફ્ટવેર સાથે ચેડાં કરીને લાયસન્સ બનાવાયાં હોવાંની વાત બહાર આવી છે.