કાર્યવાહી / સુરત જિલ્લા પોલીસ વડા એક્શનમાં, ફરજમાં અનિયમિતતા બદલ 80 GRD જવાનોને છૂટા કરાયા

• GRD જવાનોને લઇને જિલ્લા પોલીસવડા એક્શનમાં
• સુરતમાં 80 જી.આર.ડી જવાનોને ફરજમાંથી મુક્ત કર્યા
• ફરજમાં અનિયમિતતાને પગલે પોલીવડાએ નિર્ણય લીધો

સુરતમાં ફરજમાં અનિયમિતતા દાખવનારા જી.આર.ડી જવાનોને લઇને જિલ્લા પોલીસવડા એક્શનમાં આવ્યા છે. જિલ્લા પોલીસ વડા દ્વારા અલગ-અલગ પોલીસ મથકમાંથી જી.આર.ડી જવાનોને :છૂટા કરવામાં આવ્યા છે. જી.આર.ડી.જવાનોની ફરજમાં અનિયમિતતાને લઇને પોલીસવડાએ આ પગલાં લીધા. જિલ્લામાંથી 80 જેટલાં જી.આર.ડી જવાનોને ફરજ પરથી દૂર કરવામાં આવ્યા છે. જિલ્લાના ઓલપાડ, કોસંબા અને માંગરોળ સહિતનાં પોલીસ મથકમાંથી જી.આર.ડી જવાનોને છૂટા કરવામાં આવ્યા છે.

ગઇકાલે જ સુરત પોલીસે કુલ 37 TRB જવાનોને ડિસમીસ કર્યા

ઉલ્લેખનીય છે કે, સુરતમાં થોડા દિવસ પહેલાં સુરતના જ વકીલ મેહુલ બોઘરા પર TRB જવાનના સુપરવાઇઝરે કરેલા હુમલાને લઇને સમગ્ર રાજ્યમાં લોકોમાં ભારે આક્રોશ જોવા મળી રહ્યો છે. ત્યારે આ મામલે પણ સુરત પોલીસ એક્શન મોડમાં આવી છે. કારણ કે ગઇકાલે જ સુરત પોલીસે કુલ 37 TRB જવાનોને ડિસમીસ કરી નાખ્યા છે. વાહનચાલકો સાથે ગેરવર્તણૂંકને લઇને પોલીસ દ્વારા આ કાર્યવાહી હાથ ધરવામાં આવી છે. ઘણા લાંબા સમયથી કેટલાક જવાનો ફરજ પર હાજર ન હોતા રહેતા. તેમજ TRBના જવાનો નાણાંની ઉઘરાણી કરતા હોવાની પણ પોલીસને ફરિયાદો મળી હતી. આથી, ગઇ કાલે જ TRBના 37 જવાનોને ડિસમીસ કરવામાં આવ્યા છે.

સુરતમાં અગાઉ 9 TRB જવાનોને ફરજ પરથી દૂર કરાયા હતા

મહત્વનું છે કે આ અગાઉ સુરતમાં 9 જેટલા TRB જવાનોને ફરજ પરથી દૂર કરાયા હતા. ફરજમાં બેદરકારી દાખવનારાઓ સામે સુરત પોલીસ દ્વારા કડક કાર્યવાહી કરવામાં આવી રહી છે. ત્યારે ટ્રાફિકમાં ઉઘરાણાની બુમ વચ્ચે ગઇકાલે 37 TRB જવાનો અને એ અગાઉ 9 જેટલાં TRB જવાનોની હકાલપટ્ટી કરવામાં આવી હતી. ચાલુ ફરજે ફોનનો ઉપયોગ કરવાથી માંડીને પોઇન્ટ પર ગેરહાજરીને લઈને સુરત પોલીસ દ્વારા આ પગલા લેવાઇ રહ્યાં છે.

સાબરકાંઠામાં TRB જવાનનો લાંચ માગતો વીડિયો થયો છે વાયરલ

ઉલ્લેખનીય છે કે, રાજ્યમાં અનેકવાર TRBના જવાનો પોતાની દાદાગીરીને લઇને વિવાદમાં આવતા રહે છે. ત્યારે ગઇકાલે જ સાબરકાંઠાના વડાલી નજીક એક TRB જવાનનો લાંચ માંગતો વીડિયો સોશિયલ મીડિયામાં વાયરલ થયો હતો. જેમાં એક વાહનચાલક સામે TRB જવાન રોફ જમાવતો જોવા મળી રહ્યો છે. પૈસા માંગનાર TRB જવાને કારસવારનો મોબાઈલ પણ ઝૂંટવી લીધો હોવાનું વીડિયોમાં દેખાઇ રહ્યું છે. આ TRB જવાને વાહનચાલક પાસેથી રૂ. 4 હજારની માંગણી કરી હતી. તો પણ 'ઉલટા ચોર કોટવાલ કો ડાંટે' તેમ TRB જવાન વાહનચાલકને ધમકાવી રહ્યો છે.