મુંબઈના બાંદ્રાથી ત્રણ લોકો સુરત આવ્યા હતા-શરદ સિંઘલ
ગુજરાતના ભાવિને ડ્રગ્સના રવાડે ચઢાવવા રોજબરોજ નીત નવા પેંતરા થઇ રહ્યા છે. ક્યારેક દરિયાઇ માર્ગે તો ક્યારેક ઓનલાઇન ડ્રગ્સને વેપલો કરવામાં આવે છે. રોજબરોજ ડ્રગ્સ ઝડપાયુ હોવાની ઘટના બનતી રહે છે ત્યારે આજે સુરતમાંથી MD ડ્રગ્સ સાથે 3 આરોપીની ધરપકડ કરવામાં આવી.
કેવી રીતે મુંબઇથી સુરત લાવતા હતા ડ્રગ્સ ?
સુરત ક્રાઇમ બ્રાંચે 6 લાખના એમડી ડ્રગ્સ સાથે 3 આરોપીની ધરપકડ કરી છે. કેવી રીતે ડ્રગ્સ સુરત લાવતા હતા તે મોડસઓપરેન્ડી વિશે વાત કરતા જોઈન્ટ CP શરદ સિંઘલે નિવેદન આપતા જણાવ્યું કે મુંબઇના બાંદ્રાથી 3 લોકો સુરત આવ્યા હતા. મુંબઇ મીરા રોડથી આરોપીઓ આવ્યા હતા અને છેલ્લા 3 મહિનામાં તેઓએ 3 વાર સુરતની મુલાકાત લીધી. તેઓ જે કારમાં આવતા હતા તે કારના પાર્ટ્સમાં જ ડ્રગ્સ છૂપાવીને લાવવામાં આવતુ હતું.
60ગ્રામ એમડી ડ્રગ્સ સાથે 26.19 લાખનો મુદ્દામાલ જપ્ત
વધુમાં જણાવ્યું કે આ અંગેની બાતમી મળતા ક્રાઇમ બ્રાંચ દ્વારા પુણા ગામ કંગારુ સર્કલ પાસે વાહનોમાં ચેકિંગ કરવામાં આવ્યું જેમાં ડ્રગ્સ સપ્લાયનો ઘટસ્ફોટ થયો. 6 લાખની કિંમતનું 60 ગ્રામ એમડી ડ્રગ્સ સાથે 3 આરોપીની ધરપકડ કરવામાં આવી. ક્રાઇમ બ્રાંચ દ્વારા અઝરૂદિન ઉર્ફે અજજુ મહંમદ ઈસ્માઇલ ભૈયાત, અબ્દુલ રહેમાન શબ્બીરખાન પઠાણ, મહંમદ હારુન રશીદ રાઈનની ધરપકડ કરવામાં આવી. 6.07 લાખનું એમડી ડ્રગ્સ અને 3 મોબાઇલ સહિત ફોર્ચ્યુનર કાર સાથે કુલ 26.19 લાખનો મુદ્દામાલ જપ્ત કર્યો છે.
ગુજરાતમાં ડ્રગ્સ માફિયા સક્રિય
ગુજરાતમાં ડ્રગ્સ માફિયાનું નેટવર્ક સક્રિય થયું છે. આ નેટવર્ક પાકિસ્તાનથી ચાલી રહ્યું છે. જેની હેરાફેરી ગુજરાતના દરિયાઈ માર્ગે થઇ રહી છે. હિમાચલ પ્રદેશ, જમ્મૂ કશ્મીર, ગુજરાત અને મુંબઈના ડ્રગ્સ માફિયા સક્રિય થયા છે. જેથી ચારેય રાજ્યની પોલીસે સંયુક્ત રીતે તપાસ શરૂ કરી છે. જેમાં ગુજરાત ATSએ ડ્રગ્સ માફિયાઓનું સર્વેલન્સ શરૂ કર્યું છે. ઉલ્લેખનીય છે કે, ગુજરાત અને મહાષ્ટ્રમાંથી હેરોઈનનો મોટા પ્રમાણમાં જથ્થો ઝડપાયો છે.