સાયકલ દોડને લીલીઝંડી આપવા મામલે BJPના 2 મહિલા કોર્પોરેટર વચ્ચે થઇ ઝપાઝપી

સુરતમાં ભાજપના બે મહિલા કોર્પોરેટર બાખડ્યા હતાં. સુરત મહાનગરપાલિકા સંચાલિત સાયકલ દોડમાં આ બંન્ને મહિલા કોર્પોરેટરો બાખડ્યા હતાં. સાયકલ દોડને લીલીઝંડી બતાવવા બાબતે તકરાર થઇ હતી. રૂપાબેન શાહે વરાછાના કોર્પોરેટર કૈલાસબેનનું અપમાન કર્યું હોવાનો આરોપ લગાવ્યો હતો. 

કૈલાસબેનને કાર્યક્રમમાં રૂપાબેન શાહે તતડાવી નાખતાં કોર્પોરેટર રડતા-રડતા ગળગળા થઇ ગયા હતાં.અને તેમણે જણાવ્યું હતું કે "અમે પણ ભાજપના કોર્પોરેટર છીએ અને રૂપા શાહ હંમેશા અપમાન કરે છે". આ ઘટનાને પગલે સુરત મહાનગરપાલિકાના કર્મચારી દોડતા થયા હતાં.

ઉલ્લેખનીય છે કે સુરતના જાહેર કાર્યક્રમમાં મહિલા કોર્પોરેટરો સ્ટેજ પર બાખડતા સાયકલ દોડમાં આવેલ લોકોએ આ ઘટનાક્રમ મનોરંજન પૂર્વક માણ્યો હતો.જો કે મનપાના કર્મચારીઓ આ ઘટનાને પગલે આવી પહોંચ્યા હતા અને મામલાને વધુ ગંભીર બનતા અટકાવ્યો હતો.