લાલઆંખ / બાઇક લઈને નીકળતા યુવાનો ચેતી જજો! રૌફ જમાવવામાં આ ભૂલ કરી તો ભરાશો, એક્શનમાં પોલીસ તંત્ર

• સુરતમાં રોડ પર બેફામ બનેલા બાઈકર્સ સામે પોલીસની લાલઆંખ
• 125થી વધુ વાહનો કબ્જે લઈને કડક કાર્યવાહી હાથ ધરાઈ
• ન્યૂ ઈયરની ઉજવણી અગાઉ શહેર પોલીસનું કડક વલણ

31મી ડિસેમ્બરને લઈને સુરત પોલીસ હવે એલર્ટ થઈ ગઈ છે. ત્યારે સુરતના ઉમરા અને વેસુ પોલીસ સ્ટેશન હદ વિસ્તારમાં પોલીસ દ્વારા એક કોમ્બિંગ હાથ ધરવામાં આવ્યું હતું. સ્પોર્ટ્સ બાઈક લઈને રસ્તા પર સ્ટંટ કરતા, આ ઉપરાંત જોખમી રીતે વાહન ચલાવતા યુવાનો સામે પોલીસે લાલ આંખ કરી હતી અને કોમ્બિનગ દરમિયાન 125 કરતા વધુ વાહનો પણ જપ્ત કરવામાં આવ્યા હતા. 

પોલીસ દ્વારા કોમ્બિંગ હાથ ધરાયું
સુરતના ઉમરા અને વેસુ પોલીસ સ્ટેશન વિસ્તારમાં અલગ અલગ જંકશન પર સુરત પોલીસ દ્વારા કોમ્બિંગ હાથ ધરવામાં આવ્યું હતું. DCP, ACP અને પોલીસ સ્ટેશનના PI, PSI સહિતના અધિકારીઓ પણ આ કોમ્બિંગમાં જોડાયા હતા. ધૂમ સ્ટાઇલમાં વાહન ચલાવનાર, ત્રિપલ સીટમાં વાહન ચલાવનારા અને ઓવર સ્પીડમાં વાહન ચલાવનાર યુવાનો સામે પોલીસ દ્વારા કાર્યવાહી કરવામાં આવી હતી. 

125 કરતા વધુ વાહનો જપ્ત 
આ કોમ્બિંગ દરમિયાન પોલીસ દ્વારા 125 કરતા વધુ વાહનો જપ્ત કરવામાં આવ્યા છે. વેસુ અને ઉમરા પોલીસ સ્ટેશન વિસ્તારના કારગીલ ચોક, વાય જંકશન, સફલ સ્કવેર, અઠવાલાઇન્સ સહિતના અલગ અલગ જંક્શન પર આ કોમ્બિંગની કામગીરી પોલીસ દ્વારા હાથ ધરવામાં આવી હતી. પોલીસના આ કોમ્બિંગ દરમિયાન વાહન ચેકિંગની કામગીરી સમયે કેટલાક ઈસમો પાસેથી અલગ-અલગ હથિયારો પણ મળી આવ્યા હતા. 

પોલીસ દ્વારા લોકોને કરાયું આ સૂચન
જેથી પોલીસે આ ઈસમો સામે પણ કાર્યવાહી શરૂ કરી છે. તો સુરત શહેર પોલીસ દ્વારા લોકોને પણ સૂચન કરવામાં આવ્યું છે કે, 31 ડિસેમ્બરની ઉજવણી જ્યારે શહેરમાં થવાની છે ત્યારે જો કોઈ પણ લોકો 31 ડિસેમ્બરની ઉજવણી કરવાના હોય તો તેઓ શાંતિમય રીતે 31 ડિસેમ્બરની ઉજવણી કરે.