અગ્રેસર / ધોની-કોહલી સહિત IPLના પ્લેયર્સનું કાપડ ગુજરાતના આ શહેરમાં થાય છે તૈયાર, ચીનની આ મોનોપોલી પણ તોડી

• ચીનને ધોબી પછાડ આપી નિટીંગ મટીરીયલમાં સુરત અગ્રેસર
• IPL મેચમાં ઉપયોગ થતું સ્પોર્ટસ કાપડ સુરતમાં થાય છે તૈયાર
• દેશની 80% જરૂરિયાત સુરત પુરી પાડે છે

દુબઈ, શરજહાં અને અબુધાબીમાં રમાઈ રહેલી IPL એટલે કે ઇન્ડિયન પ્રીમિયર લીગ ક્રિકેટ ટુર્નામેન્ટનો ક્રેઝ દેશભરમાં જોવા મળી રહ્યો છે. ત્યારે આ ટુર્નામેન્ટના ધોની, કોહલી કે જાડેજા સહિતના તમામ ટીમના ખેલાડીઓ જે જુદા જુદા કલરફુલ ડ્રેસ કોડ સાથે મેદાનમાં ઉતરે છે તે તમામ ડ્રેસનું કાપડ સુરતમાં તૈયાર થયું છે, બીજી રીતે કહેવું હોય તો સર્ક્યુલર નિટિંગ કાપડ ક્ષેત્રે સુરતે ચીનને પણ જબરદસ્ત હરીફાઈ પુરી પાડી છે. લોકડાઉનની સાથે ચીન સાથેના તણાવના કારણે આયાત જે 800 ટનની થતી હતી તે 200 ટનથી પણ ઓછી થઈ છે અને સુરતના ઉત્પાદકોએ તે તક ઝડપી લીધી છે.

ચીનની મોનોપોલી હતી પણ હવે સુરતે આ ક્ષેત્રમાં આપી બરોબરની ટક્કર

કોઈપણ એથલેટ્સ અને તેમાં પણ ખાસ કરીને ક્રિકેટ અને ફૂટબોલ જેવી મેદાની રમતોમાં ખેલાડીઓને પરસેવો થઇ જતો હોય છે. ક્રિકેટર સહીતના ખેલાડીઓને એકશનમાં સાનુકુળ અને પરસેવો થાય નહીં તથા શરીર સાથે શ્રેષ્ઠ સંતુલન સાધી શકે તેવા સકર્યુલર નીટીંગ પોલીયસ્ટરનું ઉત્પાદનમાં વધારો થયો છે. વાસ્તવમાં ભારતમાં બનતા રેડીમેઈડ સ્પોર્ટસ માટેનું આ સર્ક્યુલર નીટીંગ પોલીયસ્ટર મુખ્યત્વે ચીનથી આયાત થતુ હતું.  ત્યારે આ ડ્રેસ ક્ષેત્રે ચીનની મોનોપોલી હતી તેને સુરતે દૂર કરી છે. સુરતમાં જ હવે સર્ક્યુલર નિટિંગ કાપડ તૈયાર થાય છે. દર મહિને લગભગ 600 ટન જેટલું કાપડ સુરત અને સિલ્વસામાં તૈયાર થાય છે. સુરતમાં સર્ક્યુલર નિટિંગ કાપડના પ્રોસેસિંગ માટે 30 જેટલા ડાઈનિંગ હાઉસ પણ ચાલે છે. જેમાં ડિજિટલ પ્રિન્ટિંગ પણ કરાય છે. અત્યાર સુધી આ ક્ષેત્રમાં ચીનની મોનોપોલી હતી પણ હવે ચીનને સુરત આ ક્ષેત્રમાં બરોબરની ટક્કર આપી રહ્યું છે.

20 વર્ષ અગાઉ ફેબ્રીક્સનો પ્રથમ પ્લાન્ટ સુરતમાં જ નખાયો હતો

જો કે સુરતમાં 20 વર્ષ અગાઉ જ આ ફેબ્રીક્સનો પ્રથમ પ્લાન્ટ નખાયો હતો. પરંતુ તે સુરતનો મુખ્ય ટેક્ષટાઈલ ઉદ્યોગ બની શક્યો ન હતો. આજે અહીં આ પ્રકારના ફેબ્રીક્સના 150 ઉત્પાદકો છે અને 3000 જેટલા મશીન છે. ઉપરાંત આ ફેબ્રીક્સ માટે લેબર ખર્ચ 50 પૈસા પ્રતિ મીટર આવે છે. આ પ્રકારના ટેક્ષટાઈલની માંગ વધી છે અને તે મલ્ટીપલ એટલે કે એકથી વધુ જેમકે સ્પોર્ટસ બુટ, સુટકેઈસ, બેબી ફ્રોક, સ્વીમીંગ કોચ્યુમ, ટીશર્ટ વિ.માં ઉપયોગમાં લેવાય છે. ખાસ કરીને બુરખામાં આ ફેબ્રીકસ ખૂબ જ ઉપયોગી છે અને આજે દેશના આ પ્રકારના ફેબીલીનું 80% ઉત્પાદન ફકત સુરતમાં જ થાય છે.