સુરત / સ્કૂલ રીક્ષામાંથી પટકાયું બાળક, VIDEO જોઈ કહેશો 'રામ રાખે તેને કોણ ચાખે'

વળાંક લેતી વખતે બાળક પટકાયું

નોંધનીય છે કે, સુરતની એક શાળાના વિદ્યાર્થીઓને ભરીને ઘરે મૂકવા જઇ રહેલી રીક્ષા શહેરની જાણીતી શાંતિ નિકેતન સોસાયટી પાસેથી પસાર થઇ રહી હતી. તે સમયે રેલીંગ વળાંક લેતા સમયે એક બાળક બેગ સાથે જ રીક્ષામાંથી બહાર પટકાયો હતો. 

બાળક પટકાયાની ગણતરીની પળોમાં ઉભું થઇ ચાલવા લાગ્યું

ચાલુ રીક્ષાના વ્હીલ નજીક જ પડ્યું હોવા છતાં બાળકને સદનસીબે કોઇપણ પ્રકારની મોટી ઇજા થઇ નહોતી અને બાળક ગણતરીની પળોમાં જ બેઠું થઇને ચાલતું થયું હતું. જો કે, આ સમગ્ર બનાવ અંગેની રીક્ષા ચાલકને જાણ નહીં હોવાથી તેણે રીક્ષા હંકારી મુકી હતી. અંતે ઘટના સ્થળની આસપાસ રહેલા લોકોએ રીક્ષાની પાછળ વાહન દોડાવીને આ બાળકને ચાલકના હવાલે કર્યું હતું. 

વાલીઓ પોતાના બાળકોની સુરક્ષા અંગે વિચારે 

સ્કૂલ ઓટોમાં ઘેટા-બકરાની જેમ બાળકોને લઇ જતા રીક્ષા ચાલકોની વારંવાર બેદરકારી પ્રકાશમાં આવી હોવા છતાં કોઇપણ પ્રકારના પગલા ભરવામાં આવે છે કે કેમ ? તે એક સવાલ છે. વાલીઓ પણ જાગૃત થઇને પોતાના બાળકોની સુરક્ષાને લઇને થોડા જાગૃત થાય અને બાળકોને જાતે જ શાળાએ મુકવા જવાનો આગ્રહ રાખે તે વધુ અગત્યનું છે.