તપાસ / સુરત : પાટીદાર અગ્રણીના આપઘાત મામલે પોલીસને મોટી સફળતા, નામાંકિત બિલ્ડર સહિત 2 ઝડપાયા

• દુર્લભ પટેલ આપઘાતનો મામલો
• ભાવેશ સવાણી, રાજુ લાખા ભરવાડની ધરપકડ
• મધ્યગુજરાતમાંથી થઈ ધરપકડ

સુરતમાં દુર્લભ પટેલ આપઘાત મામલે બિલ્ડર ભાવેશ સવાણી અને રાજુ લાખા ભરવાડની ધરપકડ કરવામાં આવી છે. ડિજિટલ સર્વેલન્સના આધારે મધ્યગુજરાતમાંથી બન્ને આરોપીઓની ધરપકડ કરવામાં આવી છે. જમીનની ડીલમાં પોલીસના દબાણથી આત્મહત્યા કરી હોવાનો ખુલાસો થયો હતો.

આ કેસ ખુબ હાઈપ્રોફાઈન કેસ છે. જમીન વિવાદને કારણે પોલીસ અને ભૂમાફિયાના ત્રાસથી દુલર્ભ પટેલે મોત વહાલુ કર્યુ હતુ. જે મામલે પોલીસ સહિત બિલ્ડરની પણ ધરપકડ કરવામાં આવી છે. 

સુરતમાં પોલીસ-માફિયાની સાંઠગાઠના નેટવર્કનો ચોંકાવનારો પર્દાફાશ થયો હતો. 

ઉલ્લેખનીય છે ગુજરાત સરકાર દ્વારા કાયદો વ્યવસ્થા હાથમાં હોવાના દાવા કરાઈ રહ્યાં છે. જ્યારે હવે તો માફિયા સામે ગુંડા એકટ અને ભૂમાફિયાને ડામવા માટે નવી જોગવાઈઓની વાતો ચાલી રહી છે ત્યાં સ્માર્ટ સિટી સુરતમાં કાયદો વ્યવસ્થાનું પાલન કરાવવાની જવાબદારી જેના શિરે છે તેવા જ પોલીસકર્મીઓનું ભૂમાફિયા, બુટલેગર અને અસામાજિક તત્વો સાથેની સાંઠગાંઠનું આખું નેટવર્ક ચાલી રહ્યું હોવાનું બિહામણું ચિત્ર સામે આવી રહ્યું છે. આવામાં આ સરકારનો ગુંડા એક્ટ કેટલો કડક સાબિત થશે તે આગામી સમય જ કહેશે.

શું છે દુર્લભ પટેલ આપઘાત કેસનો ઘટનાક્રમ?  

• સુરતના માંડવીના ખંજરોલી ગામમાં ક્વોરીમાંથી દુર્લભ પટેલનો મળ્યો હતો મૃતદેહ
• સ્થાનિક તરવૈયા, ફાયર બ્રિગેડે દુર્લભ પટેલનો મૃતદેહ બહાર કાઢ્યો હતો
• ઓફિસમાં તપાસ દરમિયાન દુર્લભ પટેલનો પત્ર મળ્યો હતો
• અડાજણની જમીન ડીલમાં રાંદેર પોલીસ સ્ટેશનના PIનો કર્યો હતો ઉલ્લેખ
• PI અને પોલીસ સ્ટાફના માણસો, ભૂમાફિયા ધમકી આપતા હોવાનો આરોપ
• માંડવી પોલીસે PI સહિત 11 વિરુદ્ધ દુષ્પ્રેરણાનો ગુનો દાખલ કર્યો હતો
• દુર્લભ પટેલ જલારામ સ્ટોન ક્વોરીના માલિક હતા 
• દુર્લભ પટેલની જમીનનો સોદો 24.03 કરોડમાં થયો હતો 
• સ્ટાર ગ્રુપના માલિક કિશોર કોસીયા સાથે સોદો થયો હતો
• વર્ષ 2014માં દુર્લભ પટેલે સોદો કર્યો હતો 
• ડીલ પ્રમાણે 18 કરોડ રોકડા અને 3.09 કરોડના ચેક આપવામાં આવ્યા હતા
• કિશોર કોસીયાને ત્યાં ઈન્કમટેક્સના દરોડા પડ્યા હતા 
• દુર્લભ પટેલની જમીન ડીલ અંગે ઈન્કમટેક્સને જાણ થઈ હતી 
• ઈન્કમટેક્સે દુર્લભ પટેલને 8.49 કરોડ ચૂકવવા નોટિસ આપી હતી 
• કિશોર કોસીયાની ખોટી માહિતીના કારણે દુર્લભ પટેલને રૂપિયા ભરવાના થતા વિવાદ થયો
• કિશોરભાઈએ જે તે સમયે પૈસા ભરવા કબૂલાત આપી હતી 
• ફેબ્રુઆરી 2019માં રાંદેરના PI લક્ષ્ણસિંહ બોડાણાએ દુર્લભ પટેલને બોલાવી ધમકી આપી હતી
• રાજુ લાખા ભરવાડ, હેતલ નટવર દેસાઈએ પણ આપી હતી ધમકી 
• ભાવેશ કમરશી સવાણી પણ તે સમયે ત્યાં આવ્યા હતા 
• રાતોરાત દુર્લભ પટેલને ધમકાવી લખાણ કરાવી લીધું હતું 
• 4 ફેબ્રુઆરી, 2020ના રોજ ફરી દુર્લભભાઈના ઘરે 4 પોલીસકર્મી આવ્યા હતા
• દુર્લભ પટેલના દીકરાએ સુરત પોલીસ કમિશનરને ફરિયાદ કરી હતી
• 18 ફેબ્રુઆરી, 2020એ રાજુ ભરવાડ, હેતલ દેસાઈ, મુકેશ કુલકર્ણીએ સાટા ખત કરાવ્યો
• PIએ નોટિસ મોકલી દબાણ લાવતા દુર્લભ પટેલે આપઘાત કર્યો હતો 
• દુર્લભ પટેલે પત્ર ક્વોરીના મેનેજરને આપ્યો હતો
• આ પત્ર તેમના દીકરાને આપવા માટે કહ્યું હતું